L’Assemblada Nacionala Occitana (ANÒC) es estada oficializada, après son inscripcion lo 20 de febrièr passat al Jornal Oficial d’Associacions de l’estat francés. “Aüra, convidam toti li fòrças vivi de l'occitanisme politic e cultural de nos rajónher”, çò declarèt son secretari Ciril Joanin.
 
La tòca d’aquela associacion, que vòl èsser transversala e integratritz, es de bastir “una organizacion populara, plurala amb una estructura politica digna e de drech internacional”, çò es, una estructura que tòque la majoritat del movement associatiu, politic e social del país amb l’objectiu de lo far avançar dins “la recuperacion de la consciéncia nacionala occitana”.
 
Lo prepaus de l’ANÒC es, doncas, la reconeissença d’Occitània coma nacion e, per tant, que se li reconesca lo drech d’autodeterminacion per, s’o vòl aital, se constituir en estat independent. E mai, l’ANÒC precisa qu’aquel estat occitan deurà èsser “de drech, democratic, social e ecologic”. Divèrsas organizacions i an aderit, aital coma de personas a títol individual de pertot del país. Delà aquel objectiu politic ambiciós, la nòva associacion tanben vòl promòure l’usatge de la lenga occitana, mai que mai dins l’educacion.
 
L’ANÒC se comencèt de bastir dins doas reünions que se tenguèron  a Rodés en julhet passat e a Montpelhièr en octòbre, per acabar en un acamp constitutiu a Marselha en novembre passat.