Lo 30 de junh passat, la darrièra emission de Conta Monde foguèt difusada sus France Bleu Occitanie. Aquela informacion, anonciada pel presentaire Geraud Delbès sus sa pagina Facebook, nos carcanha prigondament. Delbès, qu’es al cap del programa dempuèi 13 ans, a capitat a seguir la draia de figuras importantas coma Benaset Roux e Maurici Andrieu, en contunhant una tradicion de voses occitanofònas a la ràdio publica que remonta a la Liberacion.

Pendent aquestas annadas, “Conta Monde” a vist son temps de difusion reduch, en passant d’una ora a sonque 21 minutas, amb de restriccions inexplicablas coma l’interdiccion de fa sonar de musica occitana pendent quatre ans. En mai d’aquò, ara, amb lo ponch final de l’emission, se romp una cadena qu’a difusat l’occitan per mejan de la ràdio publica.

Desenant, la sola preséncia de la lenga occitana sus France Bleu Occitanie serà una corta cronica de doas minutas de l’actualitat culturala occitana dels dissabtes e dimenges de matin. Aquela reduccion drastica, mespresanta e umilianta, es un còp dur per nòstras lenga e cultura, que s’ameritan una plaça digna dins los mèdias publics.

La còla de Jornalet exprimissèm tota nòstra solidaritat amb Geraud Delbès e totes los qu’an contribuit a manténer la lenga occitana viva per mejan de la ràdio, e jonherem quina que siá crida a la mobilizacion per exigir lo retorn d’un espaci digne per l’occitan dins France Bleu Occitanie.

Es lo moment de cridar fòrt e defendre nòstra dignitat coma país que vòl viure. Los servicis publics devon èsser mai que mai al servici de totòm, doncas tanben al servici dels pòbles minorizats. Exigissèm que Radio France torne considerar sa decision e restablisca ContaMonde, una emission d’interès public qu’a per tòcas d’assabentar, de far descobrir e de divertir en lenga nòstra. La cultura occitana a drech al respècte e a la visibilitat. Daissem pas calar una autra votz.

Peticion sus Change.org per restablir l’emission Conta Monde