La redobertura dels magazins d’una superfícia superiora a 400 mètres cairats tòca pas que la Nauta Garona Vist que la màger part son pas a temps complet, refusam rarament aqueste petit complement Avèm pas brica informacions dels sindicats

Autorizar o non los comèrcis a dobrir lo dimenge fa debat dins l’estat francés. Dins lo departament de la Nauta Garona, la màger part dels supermercats dobrisson los dimenges de matin tre que la lei o autoriza. Mas aquel es lo sol departament ont cada annada, dempuèi 1989, se signa un acòrdi entre los sindicats, lo Movement dels Entrepreneires de França (MEDÈF) e las Cambras de Comèrci e Indústria (CCI) sul nombre de dimenges que los magazins pòdon dobrir.
 
En octòbre passat, lo departament enebiguèt de dobrir los dimenges, mas lo mandat prefectoral durèt solament una setmana, e lo dimenge seguent se tornèt dobrir.
 
Per conéisser melhor lo vejaire dels salariats sus aquel afar, lo nòstre collaborador Pascau Sebat a parlat amb la caissièra d’un supermercat hard discount del País Tolosan. E mai se l’obrièra vòl, logicament, demorar anonima, Jornalet vos ofrís sa convèrsa amb el.
 

Com client, ne compreni pas: en octobre, que i avè dus panèus qui disèn que lo ton magazin e los autes n’obrirén pas mei lo dimenge e ara, que torna obrir. E ns’ac pòts explicar? L’interdit d’octobre e vienè d’un arrestat prefectorau e los magazins an hèit apelacion?

La redobertura dels magazins d’una superfícia superiora a 400 mètres cairats es deguda a l’anullacion de l’arrestat prefectoral del 23 de julhet de 2013 pel tribunal administratiu de Tolosa. Tòca pas que la Nauta Garona.
 

Mercés! N’aví pas vist aqueste article!
 
Es pas una demanda en apelacion mas [l’arrestat es suspendut] fins que lo tribunal estatuisca.
 
 
Per l’aver viscuda com salariada, que pensas de l’obertura deus comèrcis lo dimenge?
 
Personalament soi contra la dobertura lo dimenge: los clients an pas que de prene lors precaucions la setmana o ben anar dins los petits comèrcis coma Casino o 8 à Huit. 

 
Demiei los tons collègas, e n’i a que’us agrada de tribalhar lo dimenge o pensan meilèu com tu?
 
Non, mas n’i a qu’aquò chepica pas mai qu’aquò.
 
 
Avetz primas tad aquò?
 
E non, pas cap de prima.
 
 
La lei ditz que lo tribalh lo dimenge se deu har sus la basa deu volontariat. E respèctan la causida deus qui ne vòlen pas tribalhar lo dimenge, los tons emplegaires, o hèn pression entà qu’acceptetz?
 
En çò nòstre respèctan la basa del volontariat.
 

L’argument gròs deus patrons entà obrir lo dimenge qu’ei que crearé emplecs, en particular “petits tribalhs” peus estudiants. Que’n pensas?
 
Vist que la màger part son pas a temps complet, refusam rarament aqueste petit complement senon òc, ne pòt crear.
 

Un mot sus la comuna de Nalhós, qui demanda d’estar declarada zòna toristica entà que lo “vilatge de marcas” pòsca obrir lo dimenge?
 
Lo vesi puslèu coma un centre comercial que coma una zòna toristica.
 

I a monde sindicats a vòste? Avetz informacions deus sindicats?
 
Non, pas brica.




PS