Fasèm tot çò qu'es posible per que los jogaires sàpian parlar la lenga nòstra Nos agrada mai de jogar amb los curds o los lapons que contra Padània; mas tanben jogarem amb Tibet o Vatican sens gaitar l'aspècte religiós Seleccion oficiala pot pas èsser: i a pas cap d'estat occitan, de republica occitana ni mai de reialme d'Occitània! Seriá un brave crèbacòr, ara qu'avèm una còla de primièra, de reüssir pas aqueles eveniments per manca de finançament

 
 
Quina es la tòca de l'Associacion Occitana de Fotbòl (AOF)?
 
Las tòcas de l'AOF son de promòure las tradicions lingüisticas e culturalas occitanas pendent los eveniments esportius fotbolistics, de far véser l'identitat occitana mercés a la practica del fotbòl e de partejar de rescontres e d'experiéncias umanas amb d'autras culturas, puèi que lo fotbòl es encara la pasion comuna e lo vector internacional.
 

Quina receptivitat a agut l'AOF de part dels jogaires occitans? Lor agrada de jogar amb la lor seleccion?
 
I a pas gaire de jogaires de nivèl nacional o regional que se sentan occitans. Ai contactat 88 clubs de CFA e DH d'Occitània tota per 1 responsa favorabla. Me siái estacat a recrutar de jogaires qu'aimavan lo pais nòstre, sas tradicions, e ara son fièrs de far lusir las colors nòstras.
 

Al nivèl esportiu, quin es per vos lo nivèl de la seleccion occitana de fotbòl?
 
Lo nivèl actual de la còla es un bon CFA2. La seleccion es formada amb de jogaires de CFA e dels melhors dels clubs de DH. Tanben n'i a que jògan en PH de district mas que jogaràn en liga regionala.
 

Cal èsser occitanofòn per far partida de la seleccion? A respècte de la realitat sociolingüistica del país, aquel fach pòt nòire als jogaires occitans que voldrián jogar mas que, malastrosament, sabon pas parlar la lenga d'òc?
 
Seriá melhor que los jogaires foguèsson occitanofòns mas se n'i a, los ai pas trapats e s'existisson, los esperam; seràn los benvenguts! Quand vau recrutar un jogaire, gaiti d’en primièr son nivèl esportiu (CFA a DH). Puèi parli amb el per saupre s'es estacat al país nòstre, a las nòstras culturas e tradicions, se se sent occitan, amorós de son país. Per cada eveniment esportiu e acamp, mandi un glossari fotbolistic e lo vocabulari de la vida vidanta. Fasèm tot çò qu'es posible per que sàpian parlar la lenga nòstra.

 
Cresètz que los occitans son receptius e que lor agrada l'idèa d'aver una seleccion de fotbòl, quitament s'es pas oficiala?
 
Sai pas solament se los occitans sabon qu'una còla occitana de fotbòl existís. Fasèm un trabalh enòrme amb los mèdias per aquela tòca. Pasmens, tota la gent que rescontram nos ditz qu'es una bona causa e un mejan de mai per far conéisser Occitània. Seleccion oficiala pot pas èsser: i a pas cap d'estat occitan, de republica occitana ni mai de Reialme d'Occitània! La legitimitat la tenèm pel biais dels que nos sostenon coma partenaris, es a dire lo Centre Interregional de Desvolopament de l' Occitan (CIRDÒC), l'Institut d'Estudis Occitans (IEO), la region Miègjorn-Pirenèus, etc.. Benlèu, un jorn, una federacion o una entitat occitana veirà lo jorn. Aital poirà aprofechar lo trabalh qu'aurem fach.
 

Somiatz al jorn que la seleccion occitana de fotbòl poirà jogar de partidas oficialas?
 
Avèm pensat en 2010 demandar nòstra afiliacion a la FIFA mas per aquela tòca cal èsser representat o reconegut a l'ÒNU. Demòra de camin ...
 

Avètz paur que los detractors de las seleccions esportivas non reconegudas pòscan ensajar de mesclar la politica amb l'espòrt per far mal a l'AOF?
 
L'AOF s'implica pas en politica, ni mai pensi pas que quauqu'un ensage de mesclar la nòstra activitat esportiva e culturala amb un aspècte politic. I a de còps que jogam contra d’esquipes que defendon pas lo meteis objectiu que nosautres, mas fasem abstraccion d'aquò perque volèm participar als torneges importants per nos far conéisser e podèm pas causir los adversaris. Segur que nos agrada mai de jogar amb los curds o los lapons que contra Padània; mas tanben jogarem amb Tibet o Vatican sens gaitar l'aspècte religiós. Puslèu que de voler far mal a l'AOF, esperam que las instàncias administrativas -çò es los politicians elegits que per ara nos sostenon- nos ajudaràn a finalizar los projèctes nòstres amb una pichòta subvencion.
 

Podètz avançar los eveniments venents de la seleccion? Anaretz jogar en Curdistan?
 
Per aquesta sason aviam dos rescontres de preparacion: lo 29 de decembre contra la seleccion de Cilento (victòria nòstra 2 a 0 a Fontés) e lo 30 de març contra la seleccion de Lapònia , campiona del Mond dels territòris sens estat (Viva World Cup) en 2008 dins l'encastre de la protèsta per la lenga occitana al Stadium de Tolosa (terren annèxe). Vesètz que l'AOF se prepara tre ara per las competicions de 2012. D’en primièr, la Viva Word Cup que se debanarà en Curdistan en Iraq del 27 de mai al 3 de junh. Dins l'edicion de 2010 que se tenguèt a Malta, Occitània perdèt 2 a 1 contra Curdistan en mièja finala mas ganhèt la pichòta finala per la 3a plaça 2 a 0 contra lo Reialme de las Doas Sicílias. Puèi i aurà lo campionat d'Euròpa de las minoritats lingüisticas, l'"Europeada 2012" que se debanarà a Budyšin (Saxònia) del 16 al 24 de junh. Se l'objectiu per la Viva World Cup es la finala, l'AOF anarà a l'Europeada amb l'ambicion de la victòria finala per donar al país nòstre son primièr trofèu dins un torneg màger.
 

I a pro de sòus per finançar tot aquò?
 
Per realizar aqueles projèctes nos manca a l'ora d'ara qualques mejans financièrs. Es per aquò que prepausam a totes los que nos vòlon sosténer de los associar a aqueles eveniments culturals e esportius. Vaicí lo contacte se desiratz de venir un de nòstres sostens o partenaris: Nicolau Desachy. Mai d'entresenhas sul sit www.occitania-fotbol.com. Seriá un brave crèbacòr, ara qu'avèm una còla de primièra, de reüssir pas aqueles eveniments per manca de finançament.
 
 
 
 
 
 

---

Nòva restacada: Occitània a vençut Lapònia per 3 a 2