Se crearà l’Ofici Public de la Lenga Occitana (ÒPLO), un organisme public qu’aurà la tòca de definir una politica publica en favor de l’occitan. Lo conselh regional d’Aquitània o aprovèt diluns passat, segon çò que raportèt lo conselhièr regional d’Aquitània Dàvid Grosclaude, e aquesta dimenjada o apròva la region de Miègjorn-Pirenèus. Dimars passat, La Setmana ne publicava un article ont disiá qu’aquel esplech “permetr[iá] de menar una vertadièra politica publica per l’occitan a l’escala de mai d’un territòri”. De fach, La Setmana, que compara l’ÒPLO amb los oficis ja existents al Bascoat e en Bretanha, ditz que la tòca del nòu organisme serà de far trabalhar amassa de collectivitats e d’operators sul terren.
 
“Qu’ei un eveniment istoric per la lenga occitana pr’amor qu’ei lo prumèr còp qu’un organisme public aurà per mira prumèra de definir ua politica lingüistica publica”, çò afirma Grosclaude dins son comunicat, en apondent: “l’ÒPLO que serà un interlocutor a disposicion de tots los qui auràn per volontat d’ajudar lo desvolopament de la lenga e de la soa preséncia en la societat”.