Fondat en 2002 a Maiduguri, dins lo nòrd-èst del país, lo movement religiós armat islamista nigerian Boko Haram —en hausa “L’educacion occidentala es un pecat” o “es interdicha”, tanben conegut en arabi coma “Las Gents Engatjadas per la Propagacion dels Ensenhaments del Profèta e pel Jihad”— quita pas de semenar la terror dins l’estat federal de Nigèria —e en Cameron, Nigèr e Chad—  per impausar pertot la sharia. Los aperaquí 9000 milicians de la sècta jihadista combaton l’administracion nigeriana, tant l’armada coma las escòlas e las universitats. Nigèria es dirigida despuèi 2010, en seguida d’un interim, confirmat per l’eleccion presidenciala de 2011, pel crestian Goodluck Jonathan. Lo govèrn federal a tanben d’acarar, dins lo sud, la rebellion del MEND (Movement for the Emancipation of Niger Delta “Movement per l’Emancipacion del Dèlta de Nigèr"), que se revendica del socialisme democratic e que lucha per las armas contra los interèsses de las societats estrangièras qu’extrason lo petròli nigerian. Cal saber que Nigèria, lo país mai poblat d’Africa —a l’entorn de 170 milions d’estatjants—, produtz de petròli, l’expòrta, mas ten pas nada refinariá per produire son carburant, qu’es obligat de l’importar. Nonmàs un quart de la populacion nigeriana benefícia de la produccion petrolièra mentre que lo país patís de problèmas de corrupcion e de fugida dels capitals qu’aumentan las tensions etnicoreligiosas.

Dins lo nòrd de Nigèria, de majoritat musulmana —los crestians son majoritaris dins lo sud—, la sècta Boko Haram, que bandiguèt una temptativa d’insurreccion dins los estats del nòrd en 2009, s’illustra tristament per de mesfaches sovent qualificats de crimes contra l’umanitat: destruccion de glèisas o de vilatges, atemptats contra d’estacions de trens o d’ostalariás, chaples de populacions, en particular crestianas, minoritàrias dins l’airal. L’an passat, per illustrar son nom hausa, sequestrèt dins d’òrras condicions 237 liceanas de Chibok, çò qu’esmoguèt la comunautat internacionala. Boko Haram anoncièt un acòrdi de liberacion per dire, fin finala, que las joventas èran estadas maridadas e convertidas a l’islam. Una liceana qu’aviá capitat a fugir contèt que sas camaradas èran violadas e que devián acceptar de se far musulmanas se volián pas èsser escoteladas.

Aquestes jorns, la sècta islamista, que contrarotlariá 20 000 quilomètres cairats del país, intensifica sos atacs, probable a causa del començament de la campanha per l’eleccion presidenciala de febrièr. A l’entorn de la vila de Baga, a la frontièra amb Chad, los milicians venon de cometre çò que sembla d’èsser lo pièger chaple de lor istòria: fa una setmana cremèron de vilatges, provoquèron l’exòde de centenats de personas sens vitalha cap una illa del Lac Chad, e ne matèron de centenats d’autras.  

Ara lo grop terrorista, qu’anoncièt un califat en agost passat, sembla que siá capable dels procediments mai atròces. Divendres 9 de genièr, se cometèt un atemptat suicidi que tuèt almens 16 personas e ne nafrèt un vintenat dins un mercat de Maiduguri. Avián estacat una bomba a una drolleta de 10 ans. Se repetiguèt la meteissa orror ièr dimenge, aqueste còp amb doas drolletas d'11 ans, dins lo mercat de Potiskum, la capitala economica de l'estat de Yobe, ont, en novembre passat, un atemptat aviá fachas 48 victimas.




GJB