Ara ocasion dera Hèsta Major de Vilamòs, s’a celebrat aguest dimèrcles 15 d'agost passat era ceremònia entà méter en tròn er imatge de Sant Ròc, sant patron dera vila. Era ceremònia qu'a estat acompanhada d’ua missa cantada en occitan aranés a cargue dera corau Es Paoesses dera Associacion Es Paums, dirigida per Lúcia Mas.
 
Er acte, s’a celebrat ena glèisa de Santa Maria de Vilamòs, damb era preséncia de Joseph Geethafonkalan, prèire de Vilamòs; deth sindic d’Aran, Carlos Barrera; de Francisco Castet Condò, baile de Vilamòs; e de José Antonio Castet, president dera Associacion Es Paums, entre d’auti.
 
Era entronizacion dera imatge de Sant Ròc a estat possible mercés ara collaboracion de diferentes institucions e particulars, de soslinhar a Tònho Castet e a Jèp de Montoya, que i an trabalhat damb era associacion Es Paums.
 
Er imatge ei òbra de Antonio Fernández de Ortega García de Acilu, un artista basco que trabalhe en Aran dempús mès de 15 ans. Eth qu'ei autor d'òbres coma era restauracion dera Crotz Processionau de Les, era còpia dera Mair de Diu de Mijaran, eth Devarament deth Crist de Mijaran damb es personatges de Nòste Sénher, Era Mair de Diu, Jusèp d’Arimatèa, Nicodèm e Sant Joan de grandor naturau en tot préner coma referéncia eth Crist de Mijaran e es diferenti devaraments romanics deth Talhèr d’Erill e dera Val de Boí, eth Retaule de Mijaran damb es imatges de Jaime Ir e eth Venerable Frai Joan de Vilamòs, era restauracion de Santa Lúcia, Sant Julian e era Mair de Diu de Garòs, o de Santa Anna damb era Mair de Diu mainada, Sant Ròc, era Mair de Diu deth Rosèr d’Aubèrt e Nòsta Senhora de Montgarri.
 
 
 
Arténher/Redaccion
            
        
    

fffff		fffff
	Los Gòis a Sant Ròc de Vilamòs   Pendent la ceremònia d'entronizacion de l'imatge de Sant Ròc, se cantèt los Gòis a Sant Ròc de Vilamòs, amb las paraulas de Jèp de Montoya e la musica de Jaume Masana dich Castèth.   E mai siá una tradicion d’origina catalana, tanben se canta de gòis dins qualques vilatges de la Val d’Aran. A Vilamòs s’èran perduts e ongan los an recuperats gràcias a l’iniciativa de Tònho Castet.   Los “gòis” son de cançons de tradicion populara que se cantan a la Verge, a Jèsus o als sants de cada vilatge. Se cantan collectivament dins l’encastre d’un eveniment important coma una messa o una fèsta votivas o una procession, e es lo biais popular de mercejar lo sant pels bens recebuts o per li demandar de santat, de favors o de bonaür.