Dempuei lo mes d’octòbre, una centenada de personas ocupan los quauques 1800 ectars de la Zòna d’Amainatjament Diferat (ZAD) ont se deu bastir l’aeropòrt dau Grand Oest a Kernitron-al-Lann^[1] rasís Nantas. La prefectura de Leir-Atlantic lancet l’operacion de polícia “Cesar” per los deslotjar e permetre a Vinci de començar la construccion. Elodie e Pierre son dos militants bretons qu’i participeron. Nos contan çò que vigueron mai lor experiéncia militanta.

Quantben de temps setz demorats sus la ZAD?
 
- Sem pas en permanéncia sus la ZAD, essaiam d’i èsser au mens totas las setmanas pendent una jornada o doas. Lo primier còp, qu’era queste estiu ente i passèrem tres jorns, en temps de patz. Dempuei la debuta de l’operacion Cesar, i anerem dos còps, per portar dau materiau (noiridura, ’bilhament, materiau medicau, pilas...) mas tanben per los sostenir moralament. Juguèrem de musica (acordeon, flauta, guitara, chant) a l’entorn dau fuòc, sus las barricadas. Qu’es pas grand chausa mas quò demorarà per n’autres un moment magic.
 
 
Nos podetz contar çò que viguèretz?
 
- Un òrt collectiu e bio enòrme, daus abitats DIY^[2] fòrça ingeniós, a partir de paletas. Me suvene mai que mai d’una chabana bastida per doas filhas, que los murs avián p’un angle a l’encair, sus dos estatges, emb un tech-terrassa jos los aubres.
 
La chabriariá tanben o una maison renovada emb dau bardís per far un dormitòri collectiu qu’utiliza daus mejans d’isolacion fòrça ingeniós. Avem vist tanben de las personas que venián de l’Euròpa tota, solidàrias e dubertas que t’acuelhan a bela braçada. Quand ses a la ZAD, te demandam pas qui ses o perque ses aquí. Ses aquí e qu’es ta plaça. Mai recentament avem vist las barricadas, bastidas emb los mejans disponibles. La mai brava es la facha emb de las placas anti-squatt. Çò estonant es la soma de compenténcias reünidas alai e la creativitat que se’n desgatja.
 
- I viguerem un modele de societat alternatiu basat sus lo partatge, la solidaritat, lo respècte e la fisança. Degun son dins lo jutjament a la ZAD, lo monde son sorisents e totjorn prestes de balhar un còp de man. Quò fai pena de tornar maison après aver passat dau temps a la ZAD!
 
 
Coma se passa l’ocupacion, qual es son objectiu?
 
- Pense pas que siajam los melhor per respondre a quela question, seguem l’ocupacion via lo sit zad.nadir.org.
 
- Mas los òmes e las femnas sus plaça son fòrça motivats e motivadas, corajtós e solidaris. Van tener longtemps, e los sostens populars exteriors los ajudan. Saben que son sostenguts de pertot en França, per daus ciutadans o daus militants d’organizacions politicas plan diversas. L’objectiu de la ZAD es clar: resistir, resistir, resistir lo mai longtemps possible e far chabussar lo projècte d’aeropòrt. La terra aperten aus paisans, pas aus capitalistas.
 
 
Podem dire que setz daus ciberactivistas: avetz lançat las operacions #opBlueBra e #op31M sus Internet e militatz au Strollad pirate Breizh (partit pirata de Bretanha). Que portatz a l’ocupacion de la ZAD e coma vivetz quela experiéncia novela?
 
- Petita rectificacion, militam pas au Partit Pirata, mas dins lo nebulós Strollad Pirate - que son doas entitats plan distinctas.
 
- Lo Strollad Pirate defend l’autonomia mai la decentralizacion a tot niveu.
 
- Per çò qu’apòrtan, via lo web, quò demòra basic. Avem creat un blòg qu’alimente au fiau de la jornada, alimente una revisda de premsa sus Seen this, twittejam e tornam twittejar, enviam daus messatges sus Facebook tanben, e essaiam d’atirar l’atencion daus medias.
 
- Per quò, utilizam tot çò qu’avem aprengut pendent las operacions precedentas qu’avem menadas: coma s’organizar en linha, coma mobilizar, coma balhar un punt de visda originau sus la question aus jornalistas... E mai utilizam nòstre libreton d’adreças! Qu’es pas nonmàs n’autres dos, qu’es los Internets que se bolegan per contrar e roinar la propagnada de l’Estat e de Vinci. Aprenguèrem L’Info-bullshit-War^[3], pas ilhs. Formam egalament los militants a la securizacion de lors comunicacions electronicas.
 
- Costat terrenh – meatspace^[4], avem montat un comitat de sosten costarmorican, e botam sus pè de las accions emb de las organizacions coma la FASE^[5], los Alternatius, lo NPA... Adonc difusem daus tractes sus lo merchat, platussam coma lo monde - suertem de maison e laissam nòstres ordinators per militar d’un biais classic, e qu’enrichessís fòrça. Anam tanben organizar una reünion publica sus lo projècte d’aeropòrt a Sant-Brieg^[6], e pensam organizar un concert de sosten que los fonds seràn reversats a l’ACIPA^[7].
 
 
I tornaretz lo 17 de novembre? Que se passarà queu jorn?
 
- Oc-plan! Lo 17, qu’es la manifestacion de reocupacion. Daus militans s’organizan pertot en França per anar sus plaça e tornar bastir las chabanas destrusidas per las milicias dau Capitau. Quò vai èsser la primiera vertadiera manifestacion unitària dempuei longtemps en França. E ven ni daus sindicats, ni daus partits politics mas daus ciutadans. Jean-Marc Ayrault aurà au mens reüssit quò: mostrar que la solidaritat existís dins nòstre país e qu’ensems sem mai fòrts que los oligarcs.
 
 
 
 
Maime Caillon
 
 
 
_____
[1] Notre-Dame-des-Landes en francés
[2] DIY: Do It Yourself - Zo fai te-mesma
[3] Guerra contra la desinformacion organizada per los grands medias, las entrepresas, los Estats, echa
[4] monde charnau: lo monde reau, en oposicion au monde virtuau d’Internet
[5] Federacion per una Alternativa Sociala e Ecologica: amassada politica que reünis daus militants comunistas, ecologistas e antiliberaus. Fai partida dau Front de mança.
[6] Saint-Brieuc en francés
[7] Associacion Ciutadana Intercomunala de las Populacions concernidas per lo projècte d’Aeropòrt de Kernitron-al-Lann: http://acipa.free.fr/