Malgrat la proposicion d’un grand debat nacional facha pel president francés Emmanuel Macron, las protèstas dels Gilets Jaunes contunhan amb vam. Aquesta dimenjada, las carrièras de l’estat francés an viscut la desena tièra de protèstas. De milièrs de personas, environ 84 000 segon las donadas oficialas, se son mobilizadas per tot l’estat francés per exigir la demission de Macron. Occitània es totjorn lo país ont las protèstas an mai de vam, mai que mai a Bordèu e a Tolosa ont aperaquí 10 000 personas an protestat per carrièras. Las manifestacions finisson totjorn amb d’afrontaments amb la polícia e amb de nombrosas personas arrestadas. Aquesta setmana, raportam lo testimoniatge de l’arrestacion d’un militant occitanista a Pau.

Dins la nuèch del 12 al 13 de genièr passat, la polícia francesa detenguèt a Pau lo militant occitanista Alan Berit-Debat dins lo quadre de la repression de la novena jornada de manifestacions del movement dels Gilets Jaunes. Berit-Debat es un obrièr retirat de 69 ans engatjat dins la CGT e Libertat. Lo movement de l’esquèrra revolucionària descriu sa detencion.
 
La detencion se passèt après la manifestacion, quand Berit-Debat tornava a son ostal acompanhat d’autras personas. Mentre que caminavan, una forgoneta de policièrs venguèt a lor rescontre, un dels policièrs cridèt “Es aqueste lo menaire!” en senhalant lo militant occitanista, e l’arrestèron d’un biais fòrça violent. Al comissariat lo desvestiguèron e l’interroguèron en eslip. Lo mantenguèron embarrat 14 oras.
 
Durant l’interrogatòri, que se tenguèt en preséncia de son avocata Marie-Claude Laborde-Apelle, las acusacions foguèron de mai en mai grèvas: l’acusèron successivament d’aver bandit de pèiras e d’autres objèctes sus las fòrças de l’ordre, d’aver alucat lo fuòc de las barricadas e d’aver provocat d’accions violentas; puèi d’èsser l’organizaire de las susmautas. Enfin, lo daissèron sortir sens que foguèsse inculpat de res. D’autres detenguts an pas agut lo meteis sòrt.
 
 
La question occitana
 
Libertat participa a las manifestacions dels Gilets Jaunes dempuèi lo començament d’aquel fenomèn social, fa dètz setmanas, en metent a la disposicion dels manifestants lo sèti social e las ressorsas del movement de l’esquèrra occitana. “Qu’ei un tribalh vertadèr e en pregondor qui hèm suu terrenh los militants occitanistas en estar presents shens ambigüitat e shens tanpòc escóner los prètzhèits e lo hons de la lor accion”, çò ditz Libertat, qu’assolida que quitament parla amb lo mond “qui’s hèn seguir lo drapèu francés tà avalorar la valor simbolica deu gèste”. Atal s’encargan, d’un caire, de desactivar l’ultradrecha e introduson, d’autre caire, la question occitana dins lo movement social. “Se las banèras occitanas que son plan amuishadas, pegasolets explicits que son tanben distribuits dab bèra escaduda”.
 
Ara per ara, son estats arrestats quatre militants de Libertat long de totas las protèstas dels Gilets Jaunes.