L’èx-president francés Nicolas Sarkozy se presentèt dijòus passat davant la justícia, a Bordèu, per s’explicar a prepaus del presumit finançament illegal de la campanha de l’UMP per las presidencialas de 2007. La justícia lo metèt en examen pel presumit abús de feblesa vèrs Lilianne Bettencourt, la nonagenària eiretièra de l’empèri cosmetic L’Oreal, per fin de li traire d’argent destinat a finançar la campanha que lo menèt a l’Elisi.

Segon çò que l’avocat de l’èx-president, Thierry Herzog, a indicat a l’AFP per telefòn, Sarkozy foguèt plaçat jos l’estatut de testimòni assistit, après dotze oras d’audicion. “I a pas agut de mesa en examen”, insistiguèt Herzog.
 
Sarkozy èra anat als tribunals dins una veitura amb las vitras negras per evitar d’èsser fotografiat.
 
S’agís del segond èx-cap d’Estat de la Cinquena Republica Francesa que deu anar als tribunals. Lo primièr foguèt lo sieu predecessor, lo tanben conservador Jacques Chirac.
 
Al delà de l’“afar Bettencourt”, Sarkozy a d’autres procèsses dobèrts amb la justícia, que dins un d’aqueles, se suspècta que l’èx-president de Libia, Muammar Al Qadhdhafi, auriá subvencionat tanben la campanha de 2007 amb cinquanta milions d’èuros.