Se debane aué ena Val d’Aran era 40u edicion dera Marcha Beret, era prestigiosa corsa d’esquí de hons d’estil classic que combine ara perfeccion eth naut nivèu esportiu damb es amators. Coma cada an, era marcha qu’amassarà ar entorn d’un milèr de persones. Eth nombre d’inscriti agèr ère ja de 800, tot un recòrd.
 
De hèt, eth vicesindic d’Aran e director der eveniment, César Ruiz Canela, expliquèc qu’eth bon ritme d’inscripcions en linha hè a pensar qu’era 40u edicion dera Marcha Beret pòt èster istorica e ua des mès multitudinàries des darrèri ans.
 
Ath delà des familhes e des grops d’amics que participen de manèra populara, era Marcha Beret tanben atrè quauqui centenats de participants d’elèit, vengudi enguan de païsi coma Norvègia, Suècia, Finlàndia, Russia, es Estats Units, Mexic, Soïssa, França e Itàlia.
 
Era corsa que prepause 3 distàncies —10 quilomètres, 21 quilomètres e 42 quilomètres— que passen peth Plan de Beret a 1850 mètres de nautada.
 
Era corsa qu’ei promoiguda peth Conselh Generau d’Aran e pera estacion d’esquí de Vaquèira-Beret. Que compde, ath delà, damb era collaboracion der Ajuntament deth Naut Aran, dera Associacion des Volentaris dera Val d’Aran e d’auti organismes e entitats mès dera Reiau Federacion Espanhòla des Espòrts d’Iuèrn e dera Federacion Catalana des Espòrts d’Iuèrn.
 
 
 
 
 FM