La Val d’Aran a aculhit un còp de mai l’espectaclosa Copa del Mond d’Snowboard FIS. A l’eveniment an participat unas tres mila personas que son anadas veire los 91 esportius, 56 òmes e 35 femnas, en provenença d’Alemanha, d’Andòrra, d’Argentina, d’Austràlia, d’Àustria, de Canadà, d’Espanha, dels Estats Units, de França, de Finlàndia, d’Itàlia, de Japon e dels Païses Basses.
 
Lo sindic d’Aran Carlos Barrera felicitèt l’estacion d’esquí de Vaquèira e se congostèt de la projeccion internacionala del país occitan de cap de Garona. “Arrecéber ua pròva tan importanta coma aguesta en dues escasences en tres ans demòstre eth naut nivèu d’organizacion de Baqueira Beret e era grana capacitat dera Val d’Aran entà acuélher pròves esportiues de prumèr nivèu mondiau, donques qu’un còp mès, fòrça espectators en tot eth mond an pogut conéisher eth nòste país”, çò diguèt.
 
La primièra plaça de la competicion femenina l’a daverada la chèca Eva Samkova e la segonda es estada per la savoiarda Chloé Trespeuch. L’austrian Alessandro Haemmerle es lo ganhaire de l’espròva masculina, seguit per l’australian Adam Lambert.