Se ten a Canas (Vencenc) la 72a edicion del Festenal Internacional de Cinèma. Es l’eveniment pus important del Mond pertocant lo cinèma, e doncas, un eveniment màger d’Occitània. Los jornalistas Zep Armentano e Adriana Díaz son aquí pendent qualques jorns e rapòrtan l’eveniment sus plaça per Jornalet.

En 1993, a sos 23 ans, Robert Rodriguez faguèt El Mariachi amb un budgèt de 7000 èuros. La linha pauc seriosa del cinèma d'esplechacion que prenguèt la carrièra del realizaire a sonque fach que rebatre aquela filosofia del petit budgèt, qu'el n'es un escolan privilegiat. Robert Rodriguez a subreviscut 25 ans sens cambiar d’aprochament al cinèma e sens s'aluenhar d'Hollywood, gràcias a l'efectisme dels basses còstes de la cinematografia numerica a començament dels ans 1990 e a l’efectivitat dels efièches per montatge. Es talament important per son succès lo fach que Robert Rodriguez es tan bon realizaire coma filmaire e montaire.
 
Sos longs-metratges mai a l'estil “Rodriguez” serián Machete, Planet Terror e Sin City. Son realizaire pus parion, Quentin Tarantino. Son arma preferida, las seringas, perque daissan pas de sang.


 
La gèsta de El Mariachi l’a rebatut sus de libres coma Rebel without a Crew (Rebèl sens una còla) del temps que lo filme Red11 es venguda sa classa magistrala en clau audiovisuala. Es un filme qu'ensaja de reprodusir lo fluxe de trabalh de El Mariachi amb lo meteis budgèt. Pensat coma un material didactic per sos escolans, rodat amb sos enfants Racer e Rebel coma un obrador de creativitat, Red11 foguèt un exercici talament bon qu'es a virar los festenals de cinèma. Dura doas oras e mièja, que se correspondon a una ora de conselhs documentalizats devèrs los realizaires debutants e lo resultat final d'un filme d'una ora e mièja.
 
Dins la Quinzena dels realizaires poguèrem escotar sas explicacions en dirècte. “Tu tanben pòdes far un filme per mens de 7000 èuros. Se fas partida d'una minoritat, s'ès una femna, se te cal far sentir ta votz, aquesta metòda es per tu”, vaicí sa frasa mai encoratjanta. Un còp aguèt la camèra avienta, rodèt amb sonque dos lampòts, en ne variant la posicion segon cada presa, pr'amor que lo grand investiment se deviá tenir davant la camèra, sus la mesa en scèna.
 
Per l'escenari, empleguèron la metòda de las fichas. E mai se l’ordenador escriga d'un biais sequencial, lo nòstre cervèl creatiu o fa pas. Se pòt escriure a partir dels accidents mai importants de ton filme sus de fichas individualas e apondre tant de fichas coma caldrà amb de nòvas scènas per reomplir los vueges que i a, en reorganizant las fichas, en refasent de scènas, çò que cal far es arranjar las pèiras del camin perque te pòrten sus aquela scèna o aquela autra, e en pauc temps auràs escrich un filme.
 
“Lo temps es infinit, lo temps se crèa” çò disiá en apelant al temps que trobava per Red11 quand rintrava del rodatge d'Alita, Battle Angel. La clau, çò ditz, es se regaudir del procès sens pensar a la tòca, e se te regaudisses del procès creatiu, trobaràs de temps per ton filme, vendrà un besonh gràcias a ta passion.
 
L'idèa originala de Rodriguez èra de far un obrador de cinèma per sos enfants. “Engatja los tieus, ajas pas paur”, çò convidava lo realizaire. Aquò es quicòm que se correspond amb "prend çò qu'as e non pas çò qu'as pas".
 
Çò de mai preciós del filme se capitaliza pas, mas a de repercusions amb prètz final: se tracta de la creativitat. Es lo nòstre recors pus important, lo cinèma a de besonh una adaptabilitat constanta perque, e mai s'ès plan planificat i a totjorn de contratempses. S'entestar sul problèma servís pas a res. S'as una localizacion, emplega-la, s'as un amic, convida-lo, siá dobèrt a las interpretacions dels actors, remembra que lo cinèma es un accion collectiva.
 
En començar tot sembla normalament una montanha, mas cal confiar en la creativitat. “Lo mond creson que cal d'inspiracion per se metre en movement, mas cal se metre en movement per aténher l'inspiracion.”
 
 
 
Zep Armentano
 
 
 

---

RODRIGUEZ, Robert. Red11. Troublemaker Studios, 2019. 1h15.