La polida vila de Fois es estat lo lòc d’una magnifica demostracion d’amistat cap a un òme qu’èra per far fàcia a la justícia de la jacobina Republica francesa.

Aprèp la ceremonia estatala del 11 de novembre 2012 al memorial dels mòrts de Fois, François Thonier aviá cremat una bandièra tricolòra en cridar: “Visca Occitània! A bais l’estat francés!”. Èra estat arrestat sulpic.

Ièr, dimars 18 de decembre, èra lo jorn de la siá audiéncia al tribunal de Fois. A partir de 13h30, sus la plaçòta davant lo Palai de Justícia s’amassèron un bon trentenat de personas per li portar sosten moral e amistat. Militants occitanistas e/o libertaris èran aquí, d’unes a títol individual, d’autres a representar lor partit. Demièg las bandièras occitanas, se remarquèron drapèus del Partit Occitan, del Partit de la Nacion Occitana, de Libertat ! e del CNT ariegés.

Un excellenta ambiença d’escambis, de discutida democratica a l’entorn dels tèmas de l’imperialisme francés e de l’avenidor del pòble e de la nacion occitana regaudiá los pòts dels militants.

François Thonièr se presentèt al tribunal amb serenitat, concentracion e una calma totpoderosa. Es un òme fòrça dolç e umanista, completament conscient de la siá accion. Parlèt amb cadun que lo venguèt sosténer. Declarèt: “Ai pas res contra lo pòble francés en general […] Soi un adversari de l’estat francés e dels estats imperialistas. Soi un libertari”. A prepaus de la cremason de bandièra, diguèt: “Es benlèu un pauc escessiu: es donar tròp d’importància a aqueste pelha”. Puèi ajustèt: “Soi per la defensa dels pòbles que son esquichats sul planèta e del pòble occitan en particular”.

L’audiéncia comencèt tres oras aprèp la debuta de la sesilha del tribunal. L’avocat de la defensa se mostrèt particularament bon e persuasiu. Thonier poguèt desvolopar las siás motivacions. La lei francesa prevei que l’otratge a la bandièra existís sonque pendent las manifestacions organizadas o jos la susvelhança de l’autoritat publica. Coma la bandièra foguèt cremada aprèp las ceremonias del 11 de novembre, se poguèt pas reténer l’acusasion d’otratge, mas sonque la de destruccion de bens publics (los drapèus èran la proprietat de la comuna de Fois). Cal notar que l’adjunt comunal en carga de las ceremonias commemorativas es intervengut dins l’audiéncia coma testimòni e pòrta-votz dels veterans de guèrra!

Sens suspresa, la procuraira demandèt una pena fòrça dura: una multa de 1000 èuros e 6 meses de preson amb remission! Compensacion per aver pas pogut reténer lo delicte d’otratge?

Lo jutjament es mes en deliberacion e serà rendut lo 15 de genièr.

Aprèp l’audiéncia, los militants occitanistas ofriguèron un parelh de botelhas (amb copas) de vin catalan en marca d’amistat a l’òme que gausèt se’n prendre a la bandièra d’un estat imperialista.

Ara demòra pas qu’a esperar lo veredicte dins un mes de temps.

De sègre...


 
 
TL