Amb lo desconfinament an començat de trobar de mascas e de gants que polluisson la mar. Un cabussaire de Canas apelat Laurent Lombart a publicat un vidèo amb sas trobalhas davant la còsta d’Antíbol, çò rapòrta Nice-Matin qu’assegura que del golf Joan fins a Canas la mar es plena de totes aqueles degalhs medicals.
 
Ara Lombart a creat un collectiu nomenat Operacion mar neta per netejar e conscientizar lo mond a manténer la mar neta. “Es amb lo civisme que lucham còntra lo coronavirus. Cau faire parier amb aquela pollucion. Es irresponsable de gitar sei gants per sòu”, çò assegura. Per Lombart es pas irreversible, mas “cau reagir ara”.
 
Lombart anèt filmar aquel vidèo, qu’a ben capitat suls rets socials, en coneissença de causa. “Èra inevitable”, çò ditz al jornal niçard del temps qu’assolida que d’aicí a un mes i aurà mai de pollucion d’aquela sòrta.
 
De soslinhar que las mascas e los gants son pas biodegradables, que polluisson fòrça e que demandan plusors sègles per se descompausar.