Lo Conselh General d’Aran demanda de precaucion e de respècte pels animals après que de toristas an raportat dos atacs de vacas al Plan de Beret, ont es normal de trobar de vacas a pàisser en tota tranquillitat. Lo primièr atac aguèt luòc en junh passat e la persona foguèt nafrada al torax, e dins lo segond, que se tenguèt la setmana passada, l’atacat lo deguèron evacuar en elicoptèr.
 
Segon lo conselhièr del territòri del govèrn d’Aran, Francés Bruna, las vacas aurián atacat a causa d’actituds incivicas e, doncas, afortís que lo mond devon seguir de mesuras de seguretat e prevencion fàcia als animals en montanha. Per exemple, cal pas portar de sacas blancas, que las confondrián las vacas amb las sacas de sal que las pòrtan los elevaires per las noirir. Tanpauc lor cal pas prene de fòtos de tròp près ni mai se sarrar tròp de las bèstias car se pòdon sentir menaçadas.
 
Un dels afectats assegurava a Catalonha Ràdio que las vacas avián començat de córrer devèrs eles en cargant sens qu’aguèsson comesa cap d’imprudéncia.
 
De son caire, lo president de l’associacion dels elevaires de vacas d’Aran, Antonio Ané, ditz que caldriá plaçar d’afichas informativas per que los passejaires prenguèsson consciéncia del problèma, çò rapòrta la Television de Catalonha.
 
A mai, los agents rurals exigisson que los toristas que passejan estaquen lors cans dins los airals d’elevatge.