La Tor deu Borrèu patís un nòu secutament. L’emblematic sit de Pau, ont de joves e mens joves partejan l’occitan e las luchas socialas e politicas, s’es trobat amb lo fronton davant la pòrta barralhat per que s’i installe qualques pèças d’enart, en daissant lo local sens terrassa ni a pena pro de plaça per accedir a la pòrta.
 
“Tant de mètres carrats condemnats entà tant pòc de materiau. On e’ns devem installar la terrassa? Çò que n’ei de la seguretat de la gent qui vòu entrar a la Tor? Quin indicar que —darrèr de tota aqueste rambalh— e i a un locau politicoculturau obèrt?”, çò se demanda la còla de la Tor deu Borrèu dins un comunicat ont se planhon d’èsser pas estats avisats e que cap de concertacion siá pas estada menada.
 
Delà dels nombroses senhalaments de la Comuna, la Tor deu Borrèu a patit de devises difamatòris, de violacions de la vida privada, d’agressions verbalas, de menaças psicologicas e de mòrt, de vandalisme d’inspiracion faissista...
 
Nascuda en 1992, la Tor deu Borrèu se bat per contunhar d’èsser un endrech d’amassada de l’esquèrra revolucionària occitana, ont los joves tròben un luòc de luchas socialas e politicas. Delà l’engatjament politic es tanben un estanquet ont se pòt parlar la lenga e ont la cultura del país a una plaça per se manifestar sens cap de complèxe, ont de joves e de vièlhs pòdon rompre amb la solesa de cada jorn per tornar trobar lo gaug de partejar un veire, una musica o una experiéncia.