Lo movement Calandreta a aculhit aquesta setmana una delegacion de Scola Corsa compausada d’una vintena de personas acompanhadas de l’eurodeputat François Alfonsi. Aquel rescontre de las escòlas immersivas de Corsega e d’Occitània s’es tengut amb l’objectiu de permetre d’escambis tant al nivèl de la pedagogia coma al nivèl de la creacion d’estructuras de formacion pels futurs ensenhaires.
 
La delegacion còrsa a tanplan rescontrat los representants de l’establiment superior de formacion d’ensenhaires Aprene, qu’a son sèti a Besièrs, per conéisser l’experiéncia d’aquelas estructuras cap a la formacion dels professors de las escòlas immersivas en lengas regionalas.
 
“Alfonsi, a l’iniciativa d’aqueste rencontre amb Joan Loís Blenet, a menat a Besièrs un vintenat d’actors a l’entorn de las escòlas immersivas còrsas per descobrir la realitat de las escòlas Calandreta e subretot la complexitat e la riquesa de la formacion dels ensenhaires”, çò a explicat Patrici Baccou, director d’Aprene, a la redaccion de Jornalet. Per el, “aquela dinamica se perseguirà per una cooperacion fruchosa”.
 
Scola Corsa dobriguèt doas escòlas a la rintrada de setembre e ne dobrirà d’autras tres a la rintrada de 2022; per aquela rason, totjorn segon Baccou, “es important per eles de rencontrar de parents e associatius de las escòlas Calandreta qu’existisson a Besièrs dempuèi 1980”.
 
La vesita del CIRDÒC a permés tanben d’escambiar a prepaus de las sinergias possiblas dels actors de la transmission de la lenga.
 
Scola Corsa amb sas doas escòlas de Biguglia e Bastia jonguèt la federacion Eskolim e son centre de formacion dels mèstres, l’ISLRF, en setembre de 2021. Dempuèi 1995, totes les establiments d’ensenhament immersiu en lengas regionalas i son a l’òbra, del basco (Seaska) al breton (Diwan), en passant pel catalan (La Bressola), las lengas d’Alsàcia e de Mosèla (A.B.C.M. Zweisprachigkeit) e l’occitan (Calandreta).




 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…