Se ten aquesta setmana a Salardú (Pujòlo) la 10a edicion de Pyrenades, lo festenal aranés del pireneïsme, qu’ongan a luòc del 10 al 16 d’abril. Aqueste còp, l’eveniment pren una importància màger, car lo Refugi Ròsta, qu’organiza lo festenal e qu’aculhís lo Musèu del Pireneïsme, celèbra son 43n anniversari e son adieu.
 
Pyrenades prepausa ongan un vast programa ont cal soslinhar de conferéncias, de debats, d’obradors pels pichons e pels adultes, d’excursions, de cinèma e de musica de montanha.
 
 
10a Mòstra de Cinèma de Montanha
 
La 10a Mòstra de Cinèma de Montanha, que se ten dins l’encastre del festenal, projècta un o dos filmes cada per jorn sus la vida en montanha. Lo darrièr ne serà lo documentari entitolat Aguestes montanhes-Istòries de Baquèira, sus l’istòria de l’estacion d’esquí aranesa.

 

 

Lo pireneïsme
 
“Caminar, sentir e escriure”: es aital qu’Henri Beraldi definiguèt lo concèpte de pireneïsme. Los pireneïstas èran los que favoriguèron la naissença del torisme dins aquelas montanhas amb un esperit aventurièr, naturalista e umanista. Amb lo programa d’ongan, l’organizacion del festenal cèrca de reïnterpretar lo legat dels primièrs pireneïstas per lo far reviure.
 
La volontat del festenal es tanben de dinamizar la vila de Salardú amb una proposicion de qualitat que la sostenon la comuna de Naut Aran, lo Conselh General d’Aran e d’autras collectivitats.
 
 
“Adishatz” Ròsta
 
Fondat dins lo sègle XIX a Salardú, lo Refugi Ròsta foguèt lo primièr establiment ostalièr de la Val d’Aran. Manel Rocher e Àngels Ros lo restaurèron en 1979 e l’an bailejat pendent 43 ans en tot prepausar un servici d’ostalariá que recuperava l’esperit de proximitat e lo sentiment d’ospitalitat dels ostals de fa longtemps.En 2008 tresmudèron en musèu tot l’edifici en i creant lo Musèu del Pirineïsme e dempuèi 10 ans organizan per Pascas lo festenal Pyrenades. Ara, Manel e Àngels se retiran e an cercat de nòus proprietaris, tanben amb inquietud per la montanha e pel país.