Se debanèt en Soïssa, dimenge passat, un referendum sus la limitacion dels salaris abusius. Es çò que se coneis coma l’“Iniciativa Minder”, perque foguèt impulsada en 2008 per Thomas Minder, un entrepreneire convertit en òme politic, qu’a passat quinze ans en luchant contra los abuses dels grands entrepreneires e los executius de las multinacionalas. La proposicion de Minder es de limitar los salaris, las compensacions per licenciament —nomenadas “paracasudas d’aur”— e los “bònus d’aur” d’engatjament, en donant de poder als accionaris de las entrepresas per ne decidir los maxims.

Se los caps d’entrepresas respèctan pas los limits impausats per l’assemblada generala dels accionaris de lor entrepresa, pòdon èsser condemnats fins a tres ans de preson.
 
Lo govèrn soís e las organizacions patronalas son contra l’iniciativa, mas la victòria en favor de l’Iniciativa Minder es clara: 67,9% an votat en favor e 32,1% contra. D’agís, doncas, d’una vertadièra revolucion pel país de las grandas bancas e de las finanças; e los jornals soïsses considèran que lor país vendrà “lo campion de la democracia dels accionaris”.
 
Concretament, la proposicion somesa a referendum prepausava tres mesuras. L’assemblada generala dels accionaris deurà votar annalament lo budget destinat al salari dels membres del conselh d’administracion e de la direccion. L’assemblada generala deurà renovelar annalament los administradors e lo president de la companhiá. S’eliminarà las indemnizacions per quitar un pòst de direccion, las remuneracions anticipadas e las primas per crompas o vendas entrepresarialas.