Lo referendum sus la nòva Constitucion de Tunisia, tengut diluns passat, es estat marcat pel boicòt de partits e d'organizacions de la societat civila, que considèran que lo tèxt autreja “tròp” de poders al cap de l’estat. L’oposicion a qualificat los resultats provisòris de “falsificacion e manipòla de las chifras”.
 
Lo projècte de la lei fondamentala aumenta los poders de la presidéncia, en donant a aquesta la majoritat de las competéncias, e redutz enòrmament lo poder del parlament, suspendut en julhet de 2021 pel president Qais Suʿayyid (sovent transcrich Kais Saied).
 
La nòva lei remplaçarà la Constitucion aprovada en 2014 en seguida de la Revolucion del Jansemin de 2011, que tombèt lo dictator Bin Ali.
 
 
S’anóncia que la majoritat dels votaires s’i son declarats favorables
 
La participacion al referendum foguèt fòrça bassa. Segon los resultats oficials, votèron sonque lo 28,12% dels electors. Lo cap de la Nauta Autoritat Independenta per las Eleccions, Faruk Buasker, a anonciat que la majoritat dels votaires s’i mostrèron favorables, e que solament lo 5,4% votèron contra lo projècte de Constitucion. Un total de 2,8 milions de personas anèron a las urnas, dont 2 608 000 votèron “òc” fàcia als 149 000 que se prononcièron pel “non”. Lo nombre de vòtes nuls es de 56 000, del temps que los vòtes blancs son mai de 17 000. Al referendum èran cridadas a votar mai de nòu milions de personas.