Los liceans qu’estúdian l’occitan dens tres licèus de l’Academia de Tolosa – los licèus V. Hugo de Galhac, J. Savèrna de l’Isla de Baish e  Bagatela de Sent Gaudenç – que vienen de passar ua setmana qui ne son pas prèsts de desbrombar.
 
Gràcias a l’ajuda de la Region Mieidia-Pirenèus, qui acordè un finançament important, 58 liceans que podón anar visitar Barcelona e Malhòrca, au parat d’un viatge occitanocatalan organizat peus tres professors: Olivièr Capòni, Joan-Pau Ferrèr e Nicolau Rei Bèthvéder.
 
L’objectiu qu’èra de tribalhar sus la proximitat que i a enter las culturas occitana e catalana. Au nivèu lingüistic, l’accent qu’estó hicat sus la parentat enter occitan e catalan, en tot préner en compte las particularitats locaus, com a Malhòrca on l’article “salat” ne manquè pas de suscitar la curiositat. Las visitas que permetón de préner consciéncia de la parentat qu’existeish enter los monuments occitans e catalans, que siin d’estile gotic, mudejar o enqüèra modernista. La visita de la catedrala de Palma qu’estó atau un temps hòrt deu viatge: gotic, barròc, las òbras d’Antòni Gaudí o de Miquel Barceló que hèn d’aquera glèisa un monument vertaderament  viu.
 
Los liceans qu’arrencontrèn tanben los escolans de l’Institut d’Estudis Segondari de Felanitx, qui ei un licèu de l’Èst de l’isla. Que podón atau escambiar, en occitan e en catalan, sus las diferéncias deus sistèmas educatius francés e catalan. Qu’estón tanben lo parat de comparar la situacion e l’ensenhament de l’occitan e deu catalan dab la collaboracion de Pere Grimalt e Mar Bel Esbri.
 
Qu’anèn tanben en excursion de cap a la part montanhosa de l’isla – acompanhats per un guida catalanofòne apassionant, fin coneishaire de Malhòrca – on descobrín païsatges enqüèra preservats e d’ua grana beutat, hautejat per las nèus deu Puig Major dab los sons 1445 mètres.
 
Fin finau, lo viatge que s’acabè a Barcelona on lo restaurant Jan Petit, de Jòrdi Ràfols, organizè ua serada de las escadudas au barri de Gràcia. Que podón assistir au passa-carrèra qui marcava la fin deu hestau Tradicionàrius: musica tradicionau, castèths umans, bastonèrs, diables e autes dracs… Ua hèsta qu’arresuma tot lo nhac de la cultura catalana de uei lo dia. A aqueths joens occitans de se n’inspirar adara…
 
 
 
 
Nicolau Rei Bèthvéder