Lo Departament de la Justícia dels Estats Units a dobèrt una enquista a prepaus de la publicacion suls rets socials de documents secrets del Pentagòn que revèlan d’informacions nòvas sus l’estat de la guèrra en Ucraïna e fins a quin ponch los Estats Units espionan l’armada e l’intelligéncia russas e tanben las ucraïnesas. Segon la sossecretària de premsa del Pentagòn, Sabrina Singh, “s’es fach un esfòrç interinstitucional centrat sus avalorar l’impacte qu’aqueles documents pòdon aver sus la seguretat nacionala dels Estats Units e sus nòstres aliats e sòcis”.
 
Los documents en question mòstran una avaloracion plan negativa de la fòrça militara de Moscòu mas tanben una situacion plan malaisida per l’armada ucraïnesa. Atanben contenon d’avertiments quotidians en temps real a las agéncias d’intelligéncia estatsunidencas sul moment dels atacs de l’armada russa e quitament suls objectius especifics. Aquò demòstra que los Estats Units an pogut transmetre a Ucraïna una informacion cruciala per se defendre.
 
En mai d’aquò, los documents tanben demòstran que los Estats Units espien los caps militars e politics d’Ucraïna, e d’autres aliats importants, coma Israèl e la Corèa del Sud. Los documents an complicat las relacions amb aqueles païses aliats e, a mai, an mes en question la capacitat dels Estats Units de manténer lors secrets.