Lo president del Conselh de la Lenga Còrsa espèra una “majoritat fòrta” en favor. Lo tèxt prevei l’usatge del còrs dins las escòlas e dins las relacions amb l’administracion publica. Lo projècte admet que la cooficialitat poirà solament èsser implementada se s’emenda la constitucion francesa.

L’Assemblada de Corsega votarà aquesta setmana una proposicion que poiriá donar un estatut cooficial a la lenga còrsa, e mai se caldriá tanben reformar la Constitucion francesa per que la cooficialitat poguèsse intrar en vigor. Los deputats còrses votaràn aquela question dijòus 25, pendent la session de l’Assemblada.
 
Lo tèxt que se presentarà als deputats es estat preparat per Pierre Ghionga, president del Conselh de la Lenga Còrsa. Lo projècte prevei que “lo francés e lo còrs son las lengas oficialas de Corsega” e que las doas lengas se pòscan emplegar per quin ciutadan que siá dins sas relacions amb l’administracion publica. Lo tèxt vòl que lo còrs siá emplegat coma lenga veïculara dins las escòlas, e establís un objectiu clar: a la fin de l’escolarizacion, a totes los escolans lor cal aver una bona mestriá dels còrs e del francés.
 
La proposicion còrsa es una novetat en França, ont lo francés es la sola lenga oficiala, coma o prescriu la constitucion. Aquò es lo motiu que los promotors de l’estatut de cooficialitat soslinhan, qu’aquela lei se poirà implementar solament se França accèpta d’emendar sa Carta Magna. Dins una entrevista a Corse Net Infos, Ghionga diguèt que justament es per aquela rason qu’es tant important, segon el, que los deputats còrses donen un “vòte massís” en favor de la cooficialitat: “nos cal aver una posicion democratica. [...] Vesi pas cossí la Republica Francesa se poiriá opausar a la volontat democratica d’una region”, çò argumentava.
 
Dels 51 deputats còrses, es previsible que los 15 qu’apertenon als partits nacionalistas còrses o sostengan. Dels autres 36, Ghionga espèra qu’un bon nombre de vòtes tanben seràn en favor: “Espèri una majoritat fòrta” per la cooficialitat, a dich. Lo president del Conselh de la Lenga Còrsa remembra que, fa dos ans, 36 deputats votèron una mocion favorabla a un eventual estatut de cooficialitat pel còrs.
 
Ça que la, aquel cambiament subís l’oposicion de deputats de drecha e d’esquèrra, e tanben de qualques associacions centralistas. Demest las mai remarcablas, segon Corse-Matin, i a Corse-France. Segon los sieus membres, lo còrs se deuriá solament aprene e parlar “volontàriament” e “en familha”.
 
En 2009, los deputats independentistas presentèron una mocion en favor de declarar l’oficialitat del còrs. La proposicion foguèt rebutada amb 19 vòtes en favor e 28 en contra.

Mai d’informacions:
Corse Net Infos: Langue corse: 90 % des Corses sont pour le bilinguisme

 
 
 
 
 
 
 
 
Aqueste article ven del jornal catalan Nationalia.cat, amb qui Jornalet a un acòrdi de cooperacion.