Lo conselhièr municipal d’Escòt (Bearn), Ludovic Garaig, es en cauma de la fam dins sa camioneta davant l’ostal de la comuna. Lo caumaire contèsta aital l’adesion de la comuna a la nòva carta del Pargue Nacional dels Pirenèus votada diluns passat en conselh municipal. Garaig repròcha al cònsol, Patrick Mousques, d’aver “regetat amb mesprètz” la demanda qu’un administrat portèt abans lo començament de la session per demandar una consulta per vòte als 135 abitants de la municipalitat.
 
Lo jove agricultor assegura que la mitat de la Val d’Aspa seriá contra aquela adesion. Conta qu’aquela carta “e coparé eth vilatge en dus”. E mai s’es elegit sus la meteissa lista que lo cònsol, esita pas de reclamar sa demission. Sa decision es ferma, dempuèi divendres manja pas res e sonque beu d’aiga.
 
“Be son decisions hèra importantas, un engatjament dont non sabèm pas eras accions concretas avienederas”, çò planh. Estima que l’actitud del cònsol es “antidemocratica e pòc ciutadana”.
 
De son costat, lo vesin que pausèt una requèsta al conselh municipal amb una demanda d’un trentenat de signaturas, nuançava que “non ei pas ua accion contra eth vòte deths elegits mes ua demanda legitima de s’exprimir. Qu’ei era manèra, çò que ns’a chocats”.
 
Lo vòte del conselh municipal es estat sarrat. Cinc vòtes en favor, cinc contra e una abstencion. Lo vòte del cònsol foguèt lo decisiu: “Eth conselh qu’a votat çò de mei democraticament possible”, çò assegurava lo cònsol Patrick Mousques.