De policièrs antisusmautas intrèron ièr, plan d’ora de matin, dins la Plaça Taksim, a Istambol, ocupada dempuèi doas setmanas per d’activistas opausats al govèrn de Recep Tayyip Erdoğan. La polícia ataquèt los acampats amb de canons d’aiga, de balas de goma e de gases lacrimogèns amb l’intencion de metre lo ponch final a la protèsta.
 
Lo burèu del governador local diguèt que l’objectiu dels antisusmautas, qu’intrèron ièr pel primièr còp dins la plaça, èra de “retirar de pancartas e de bandièras”, malgrat qu’ataquèsson los manifestants, e almens dos foguèron ferits. Apondèt que i aviá pas cap d’operacion de prevista al Pargue Gezi, ont anèron la majoritat dels manifestants après lo deslotjament de la Plaça Taksim. Pasmens, qualques minutas puèi, los antisusmautas intrèron tustar los manifestants dins lo pargue.

Qualques oras aprèp, milièrs de personas acampèron tornamai dins la plaça Taksim. E la polícia tornèt atacar cargar, coma o aviá ja fach uèi matin.

Lo debat sus un jardin d’Istambol que lo govèrn voliá destruir es anat creissent fins a venir un conflicte dobèrt per carrièras, amb de manifestants ferits e d’afrontaments constants dins las principalas vilas. Lo fons es l’afrontament entre los sectors mai dinamics de la societat turca e lo govèrn islamista, un chòc entre dos modèls de futur per un dels païses mai complicats de l’Orient.


Denóncia d'Amnistia Internacionala

Amnistia Internacionala a denonciat la contondenta accion policièra contra los activistas dins la plaça Taksim e lo pargue Gezi d'Istambol. Segon l'organizacion s'agís d'una accion injustificada que contraditz las declaracions del govèrn turc, qu'assegurava qu'intervendriá pas dins lo pargue.