Mès d’ua centea de persones an realizat aguesti dies es examens des desparièrs nivèus d’occitan aranés, amiadi a tèrme peth Conselh Generau d’Aran. Deth nivèu A1, s’an examinat 46 persones, dont 8 deputats deth Parlament de Catalonha que seguissen un cors ena cramba catalana. Des auti nivèus 7 persones an hèt er examen der A2, 20 deth B1, 26 deth B2 e 25 deth C1.

Demiei es persones qu’an hèt es examens se trapen es alumnes des corsi d’aranés deth Conselh Generau d’Aran e gent que s’examine individuaument.

Era acreditacion de coneishements d’occitan aranés ei ua requeréncia entà diuersi emplecs enes administracions publiques en Catalonha, sustot en Aran. S’obten damb certificat oficiau emetut peth Conselh Generau d’Aran (CGA), qu'ei era administracion competenta, que tanben convòque annaument es espròves corresponentes per nivèus, cossent damb eth Quadre Europèu Comun de Referéncia (QECR).

D’arremercar qu’ena espròva deth nivèu C1 d’enguan i auie a comentar un tèxte en gascon lanusquet escrit per Joan Jacmes Fénié, collaborador abituau de Jornalet.