Lo prestigiós jornal anglés The Guardian a publicat recentament un exaustiu reportatge que soslinha la vibranta scèna musicala occitana e sa contribucion a la preservacion de la lenga. Jol títol “Lo nòstre govèrn o vei polit mas sens importància: los musicians mantenon viva la lenga occitana de França”, l’article met en valor lo ròtle clau dels musicians  pel “ mantenement e per la revitalizacion d’una lenga que patís una pression sevèra dempuèi la revolucion francesa de 1789”.

Dins aquel reportatge, se mençona de noms famoses coma Massilia Sound System, Cocanha, Brama, Moussu T e plan d’autres que fan partida de la scèna musicala occitana, e se soslinha la persisténcia de la lenga malgrat las politicas que dempuèi de sègles ensajan de l’eliminar en universalizant solament l’usatge del francés.

“Quand la revolucion francesa de 1789 creèt la primièra republica francesa, lo govèrn impausèt una interpretacion clara de l’identitat francesa que compreniá pas las lengas e las culturas regionalas”, çò ditz l’article. “Ara, l’occitan impulsa una scèna musicala europèa animada e politica, en demostrant qu’aquela lenga es pas solament viva, mas tanben una font d’inspiracion artistica”.

L’article met l’accent sus l’importància de la musica coma veïcul per transmetre la cultura e l’identitat occitanas, e met en evidéncia que, malgrat que siá percebuda coma “cool” pel govèrn central, es totun mespresada e recep pas lo sosten que meritariá.

En mai d’aquò, lo reportatge remarca tanplan la contribucion de la musica occitana a la diversitat culturala europèa.

‘Our government sees it as cute but unimportant’: the musicians keeping France’s Occitan language alive https://t.co/RyNcko9Kaa

— Guardian culture (@guardianculture) July 5, 2023