Lo president francés, Emmanuel Macron, remodelèt dijòus lo govèrn de l’estat per ensajar de li donar un nòu vam après la crisi de la reforma de las retiradas e los rambalhs après la mòrt de Nahel. Macron sèrva Élisabeth Borne coma primièra ministra que son govèrn vei de cambiaments sus uèch nauts pòstes amb de perfils mai politics, mai que mai en educacion e santat. De soslinhar la sortida de la secretària d’estat per l’economia sociala, Marlène Schiappa, tocada per la polemica de la revista Playboy e mesa en causa dins un sospechat afar de malversament de fonzes.

De soslinhar, totun, la sortida de Pap Ndiaye coma ministra de l’educacion, que serà remplaçada per  Gabriel Attal. Attal teniá lo pòrtafuèlha dels comptes publics dempuèi mai 2022 e èra estat lo pòrtavotz del govèrn entre 2020 e 2022; es un dels òmes mai pròches de Macron e dirigirà desenant lo ministèri qu’a mai de dotacion budgetària e que pertòca 1,2 milion de salariats publics.

Tanplan, l’èx-cap de gabinet de Born, Aurélien Rousseau, es estat nomenat ministre de la santat en remplaçant François Braun. La presidenta del grop parlamentari de Renaissença dins l’Assemblada Nacionala, Aurore Bergé, serà desenant ministra de la solidaritat, en plaça de Jean-Christophe Blegui.

De criticas al govèrn Borne III

Lo govèrn Borne III foguèt revelat d’un biais progressiu dijòus passat, 20 de julhet, en suscitant de reaccions virulentas principalament de l’esquèrra, çò rapòrta Léna Coulon dins las paginas de Libération. Las nominacions ministerialas son criticadas per lor coeréncia amb l’orientacion politica jutjada antisociala e brutala de l’executiu.

Lo cap del Partit Socialista, Olivier Faure, denóncia lo metòde de revelacion del governament, en qualificant lo procediment de “bazar a la cima de l’estat”. Los deputats de La França Insomesa (LFI) an vivament criticat los ministres novèls, en los tractant d’“armas damnadas” del poder descreditat del president Emmanuel Macron, qu’acusan de mespresar las oposicions.

La deputada LFI Aurélie Trouvé denóncia la causida dels ministres, sustot Gabriel Attal e Aurore Bergé, e los a acusats de promòure de politicas favorablas als rics e de mespresar l’escòla publica. Los deputats de drecha an tot parièr criticat lo govèrn, en denonciant una “flor endogama” que concentra o poder.

Las criticas se son egalament concentradas sus Gabriel Attal, transferit al ministèri de l’educacion nacionala, per sos ligams amb l’ensenhament privat e sa defensa del Servici Nacional Universal, militarizacion dels liceans finançada amb lo budget de l’educacion e non pas de la defensa. Aurore Bergé foguèt, per quant a ela, foguèt criticada coma parlamentària per sas presas de posicion virulentas contra las oposicions e son sosten a de reformas consideradas coma antisocialas.

Lo fins ara ministre de l’educacion, Pap Ndiaye, tanben foguèt criticat per de deputats de drecha per aver qualificada la cadena de television CNews de Vincent Bolloré d’extrèma drecha.