Bastida en 1794, la catedrala de la Transfiguracion a Odessa foguèt damatjada per de bombardaments dins la nuèch de dissabte a dimenge, e mai lo centre-vila d’Odessa siá classat al patrimòni mondial de l’UNÈSCO.

L’armada russa bombèt la vila portuària d’Odessa dins la nuèch de dissabte a dimenge, en fasent dos mòrts e en damatjant la catedrala ortodòxa de la Transfiguracion.

“Dos monuments arquitecturals” patiguèron de damatges pendent aquela ataca, que provoquèt tot parièr de “copaduras de corrent”, çò a indicat l’armada ucraïnesa, en evocant sustot la catedrala ortodòxa.

De fendasclassas sul monument

Segon un vidèo mandat per la comuna de la vila sus son canal Telegram, se vei lo temple degalhat per de tirs.

Sus de fotografias presas après l’ataca, lo bastiment apareis fòrça afrabat, amb de largas fendasclas visiblas sus la faciada, mentre que de nombroses brigalhs jason pel sòl. De vidèos publicats suls rets socials mòstran lo bastiment qu’es manjat de l’interior per las flamas.

L’UNÈSCO “condemna amb fermetat”

“Segon un bilanç preliminar, mai d’un musèu situat dins lo perimètre del sit classat al patrimòni mondial an patit de degalhs, sustot lo musèu arqueologic, lo musèu de la marina e lo musèu de la literatura d’Odèssa”, çò a soslinhat l’organizacion onusiana per la cultura, la sciéncia e l’educacion, qu’apond: “Aquela guèrra constituís una menaça creissenta per la cultura ucraïnesa”, en ajustant que a recensat “de damatges sus 270 sits culturals ucraïnians” dempuèi la debuta de l’invasion russa, lo 24 de febrièr de 2022.

Missiles against peaceful cities, against residential buildings, a cathedral... There can be no excuse for Russian evil. As always, this evil will lose. And there will definitely be a retaliation to Russian terrorists for Odesa. They will feel this retaliation.

All those who… pic.twitter.com/gcpD30BFP1

— Володимир Зеленський (@ZelenskyyUa) July 23, 2023