Era Val d’Aran qu’acuèlh aué era 29u edicion dera corsa Aran per sa Lengua. S’agís d’ua manifestacion revendicatiua ena quau fòrça aranesi trauèrsen era Val, a pè o en tot córrer. Es corsaires que gessen de Les, de Montgarri o deth Pòrt de Vielha, e que s’amassen ath ser en Vielha dauant deth monument ara lengua. Qu’arribaràn en tot carrejar es terçons, que permeteràn de diboishar eth mapa dera Val ena plaça. Aquiu se i amassen normaument ues 1000 persones, e dempús des actes e des discorsi, un brave e animat concèrt de Nadau claue ua jornada que cada an ven istorica. Er eveniment qu’ei organizat peth collectiu Lengua Viua, entà revendicar er usatge sociau der aranés.

Era principau hònt de sòs entà finançar er eveniment qu’ei era venta dera samarreta dera corsa, qu’ena edicion d’enguan ei dissenhada per Carmen López.

Era corsa que compde cada an damb mès compatriòtes de Garona enjós, que vien tanplan a botjar-se peth nòste aranés, qu’ei, fin finau, er occitan de toti. Tanben i traparam era taula de merchandatge occitan de Macarèl e era der Ostau Comengés.

Emission en dirècte de País Invisible

Era còlha de País Invisible comence era dusau sason damb ua emission en dirècte en Vielha en tot retransméter tot çò que se viu ena plaça deth temps qu’arriben es corsaires, se hèn es parladisses, s’autrege eth prèmi e comence eth concèrt de Nadau. Se poderà seguir en dirècte sus YouTube e Twitch.

País Invisible ei un videopodcast que cèrque de hèr a conéisser Occitània ath public catalan. Produsit pera Associacion entara Difusion d’Occitània en Catalonha, qu’amie a bon tèrme Jornalet, País Invisible ei dirigit e presentat per Zep Armentano damb era collaboracion de Ferriòl Macip e David Valls. Era emission ei venguda pro populara en tot obtier tres prèmis de prestigi: eth prèmi de joventut dera Euroregion, eth prèmi Sonòr dera melhora produccion e eth prèmi dera Comunicacion Locau 2023 ena categoria de melhor contengut àudio.

Era dusau sason prevei episòdis mès longui e damb fòrça mès contenguts sus Occitània, er occitan, era literatura, era istòria e es istòries deth país. Entà amià’c a bon tèrme ei aviada ua campanha de micromecenatge.