De centenas de manifestants marchèron dissabte passat per las carrièras de Riam (Limanha) contra los prelevaments d’aiga efectuats per la Societat de las Aigas de Volvic, una filiala del gigant de l’indústria alimentària Danone, çò rapòrta France 3. Lo cortègi, amassat a l’apèl de divèrsas associacions dont la Preservacion de l’Environament dels Volcans d’Auvèrnhe (PREVA), martelava d’una sola votz : “Danone, tu nos assechas”.

Los manifestants denoncièron los prelevaments “considerables” operats per Volvic , en estimant que meton en perilh las fonts e corses d’aiga locals. La marca del grop Danone dins la region lèva de chepics pertocant la desaparicion progressiva de l’aiga. Per illustrar lor revendicacion, los manifestants portavan de pichons ataücs de fusta amb lo nom de las fonts agotadas.

Al cap del cortègi se trobava Christian Amblard, director de recèrca onorària al CNRS e defensor de l’environament. Amblard exprimiguèt las crenhenças partejadas per la comunautat. Lo movement reclama lo respècte de la lei sus l’aiga e los mitans aqüatics, instaurada en 2006, per metre un fren als prelevaments jutjats excessius. Segon l’associacion PRÈVA, Volvic prelèva en mejana 2,5 miliards de litres d’aiga per an, una chifra jutjada inquietanta.

En responsa a las acusacions, Volvic a afirmat prelevar mens que çò que las autoritats li permeton legalament, en mençonant un estalvi de 380 milions de litres d’aiga entre 2017 e 2020. Pasmens, los manifestants demòran determinats e preveson de manténer la pression en organizant de conferéncias e en programant divèrsas manifestacions fins al jorn que de reglamentacions mai estrictas seràn mesas en plaça e aplicadas.