En Gaza, lo bilanç de destruccion, de patiment e de personas mòrtas e nafradas es extrèmament tragic e concentra tota l’atencion dels mèdias màgers. Mentretant, los colons israelians de Cisjordania fan pojar la pression suls palestinians d’aquí e los fòrçan violentament de quitar lors ostals, segon un rapòrt que lo publica The Washington Post[1].

Lo grop israelian dedicat als dreches umans B’Tselem a documentat en Cisjordania almens sèt palestinians tuats per de colons israelians dempuèi que comencèt lo conflicte de Gaza. Pendent aqueste meteis periòde, los rapòrts de l’ÒNU indican que mai de 100 palestinians en Cisjordania son estats assassinats per las fòrças israelianas, e qu’unes cinc cents palestinians son estats fòrabandits per fòrça de lors ostals.

Aqueles atacs violents an agreujat las tensions en Cisjordania, ont las cridas a la resisténcia creisson de mai en mai del temps que tanben o fan las operacions e detencions militaras israelianas. Los grops de colons revendican l’autodefensa, mas las victimas son majoritàriament de civils, çò que causa lo chepic que i aja tornarmai per las familhas palestinianas un periòde de despossession forçada.

Dins una rara condemnacion de la violéncia, lo president estatsunidenc Joe Biden a jutjat que los atacs dels “colons extremistas” son coma “escampar de benzina suls fuòcs que ja crèman” e demanda que s’asumisca de responsabilitats. Ça que la, l’atencion internacionala e los esfòrces de seguretat d’Israèl agachan principalament Gaza.

Lo rapòrt de The Washington Post conta tanben una fusilhada recenta dins lo vilatge de Sawija, ont los colons secutan los païsans palestinians, e precisa qu’aquelas agressions quitan pas de s’intensificar.

Segon B’Tselem, los colons utilizan de metòdes plan establits d’intimidacion e violéncia per desplaçar los palestinians de lors ostals. Profièchan del fach que l’atencion internacionala es centrada sus Gaza, e aital pòdon agir en tota impunitat. En mai d’aquò, las colònias benefícian del sosten del govèrn israelian que lor provesís d’armas.

Los colons radicals israelians en Cisjordania son ja mai de mièg milion e lors colònias contunhan de s’espandir, çò denóncia lo collectiu umanitari B’Tselem.