capçalera biera tobiers

Actualitats

Internacional

L’armada israeliana a arrestada la jove activista palestiniana Ahed Tamimi per de menaças als colons

Fa 5 ans, l’adolescenta Tamimi venguèt un simbòl de la resisténcia palestiniana per aver engautat un oficièr de l’armada

L’activista palestiniana Ahed Tamimi l’arrestèron dins son ostal del vilatge de Nabi Salih, en Cisjordania, mentre que dormissiá
L’activista palestiniana Ahed Tamimi l’arrestèron dins son ostal del vilatge de Nabi Salih, en Cisjordania, mentre que dormissiá

Tèxte legit

L’activista palestiniana Ahed Tamimi foguèt arrestada dins la nuèch de dimenge a diluns per l’armada israeliana. L’arrestèron dins son ostal del vilatge de Nabi Salih, en Cisjordania, mentre que dormissiá. Veniá de publicar un messatge sus Instagram que menaçava los colons israelians. L’armada l’acusa d’incitacion al terrorisme.

“Nòstre messatge a las molonadas de colons es que vos esperam dins totas las vilas de [Cisjordania], d’Ebron fins a Jenin. Vos massacrarem, e diretz que çò qu’Hitler faguèt amb vosautres èra una badinada. Beurem vòstre sang e manjarem de vòstres cranis. Venètz, vos esperam”, çò disiá lo tèxt, escrich en ebrieu e arabi.

De remembrar que los colons israelians en Cisjordania aprofièchan totes los agaches meses sus Gaza per aumentar la pression suls palestinians que son forçats de fugir lors ostals al mièg de la violéncia.

 

Coneguda per aver engautat un oficièr de l’armada

 

En 2018, quand aviá 17 ans, Tamimi foguèt detenguda e acusada d’agarrir un oficièr de las Fòrças de Defensa d’Israèl (FDI) per aver donat un emplastre a un militar. Puèi foguèt condemnada a 8 meses de preson e a una multa de 5000 shequèls (aperaquí 1200 èuros).

Lo ministre de la seguretat nacionala israeliana, l’ultradrechista Itamar Ben-Gvir, a felicitats los soldats per aver detenguda una “terrorista”.

Tamimi es filha de l’activista Bassem Al Tamimi, que segon los mèdias palestinians foguèt arrestada la setmana passada per l’armada israeliana, quand ensajava de quitar Cisjordania e d’intrar en Jordania.

 

 

 

 

 

 

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article