La mission d’informacion menada pels jornalistas es un ben fòrça preciós e necessari dins una democracia. A respècte d’aquò, lo raportaire especial de las Nacions Unidas suls defensors de l’environament, Michel Forst, demandèt lo 29 de febrièr que lo trabalh de la premsa foguèsse facultat sul sit ocupat pels opausants al projècte de l’autoestrada A69.

Tanlèu sortit de sa visita sul luòc de la mobilizacion, a Sais (País Castrés), lo raportaire de las Nacions Unidas senhalèt plusors atenchas als dreches umans: enebicion d’avitalhament en noiridura, entravas a l’accès a l’aiga potabla, privacion deliberada de sòm dels militants per de membres de las fòrças de l’òrdre.

E aquò, luènh de l’agach dels jornalistas, non autorizats a anar sus aquel ponch màger de la contèsta.

“Pendent ma vesita poguèri constatar que la premsa e los membres de l’Observatòri tolosan de las Practicas Policièras èran tenguts a una distància importanta del sit de la “Crem’Arbre”, dins una zòna d’una visibilitat fòrça limitada,” çò denoncièt dins sa declaracion de fin de mission

Pr’amor d’aquò, demanda a las autoritats francesas de facultar lo trabalh de la premsa e dels observaires, en conformitat amb las obligacions internacionalas de l’estat. E aquò, “sens restriccion desproporcionada, e mai en delimitant estrictament, clarament e de la faiçon mai limitada possibla, tota zòna ont son pas autorizats a accedir pendent las operacions de polícia judiciària”.

Las constatacions del raportaire especial de las Nacions Unidas èran ja estats remontats per de còlas de jornalistas franceses, coma las de France3 Occitània que patisson d’empachas importantas a lor trabalh: forgons pargats davant las camèras, jornalistas filmats per las fòrças de l’òrdre, cartas de premsa fotografiadas, intimidacions. De practicas ja conegudas, fa 9 ans, dins la ZAD de Sivens [...].

“Dempuèi mai d’un an, los jornalistas de França 3 patisson d’intimidacions de part de la gendarmariá sus totes los subjèctes pertocant l’A69. Dempuèi 15 jorns, aquelas pressions son continuas e s’accentuan amb una entrava a la circulacion, dels cantatges divèrses e variats. La prefectura de Tarn alertada mai d’un còp a pas resolgut lo problèma de faiçon duradissa, cal quotidianament quistar d’autorizacions per exercir nòstre mestièr.” çò denóncia David Bobin, jornalista a France3 Tarn.

Dins la ZAD de la Crem’Arbre, e long del traçat de l’A69, la libertat de la premsa es pas garentida.

Pasmens, es un dels principis fondamentals dels sistèmas democratics que repausa sus la libertat d’opinion e la libertat d’expression. Aquela situacion va donc contra l’article 19 de la Declaracion Universala dels Dreches Umans.

Mentre que las audicions de la comission d’enquista parlamentària sus la construccion de l’A69 an començat, aquela empacha a la libertat de la premsa es fòrça inquietanta.

Per un debat democratic san e esclairat, es essencial qu’un trabalh jornalistic pòsca far lo lum suls interèsses en jòc, los damatges causats a l’environament e las consequéncias socialas e economicas d’aquel projècte d’autoestrada.

Tèxt redigit pels animators de la “Carta per un jornalisme a la nautor de l’urgéncia ecologica”
Sorsa: Infonature.media