Sus las ribas d'Artèira, al nivèl de Clarmont-Ferrand, un tresaur arqueologic es estat descobèrt fa gaire a Pontcharrau, çò rapòrta Ça m’intéresse. Las excavacions menadas per una esquipa d'arqueològs an mes al jorn un vertadièr testimoniatge de l'istòria umana, amb pas mens de 285 sepulturas neoliticas, en revelant una ocupacion umana de 4000 ans. Lo sit foguèt abandonat pendent lo IIIn milleni abans lo Crist, a l’epòca qu’en Egipte los faraons bastissián lors piramidas.

Aquela descobèrta foguèt realizada pendent los trabalhs de l'A75 entre 2019 e 2020, sus un sit conegut dempuèi los ans 1980 mas dont la riquesa arqueologica èra encara largament mesconeguda. L'Institut Nacional de Recèrcas Arqueologicas Preventivas (Inrap) a anonciat que las excavacions an permés de descriure nòu ensembles cronologics que cobrisson tota l'epòca neolitica, en ofrissent aital un apercebut remarcable de l'evolucion culturala e de las practicas funeràrias dins la zòna.

Segon los cercaires, lo sit coneguèt de fasas d'ocupacion temporària aital coma de periòdes dedicats exclusivament als rites funeraris. Las tombas, per la màger part de simplas inumacions en fòssa, revèlan una diversitat remarcabla, ja que d’unas contenon mantun defunt depausat a diferentas epòcas.

Demest las descobèrtas mai remarcablas figuran de pèças que remontan a mai de 6400 ans abans lo Crist, sustot de rèstas d'animals del Mesolitic e de sepulturas que contenián d’objèctes simbolics tals coma de banas de cèrvi cortetas e de defensas de singlars. Las tombas mai ancianas datan de 4400 abC.

Aquel sit arqueologic excepcional demòstra l'importància de Pontcharrau dins l'istòria preïstorica de la region. Las recèrcas en cors permetràn segurament d'aprigondir nòstra compreneson de la vida anciana en Auvèrnhe e de presentar un tablèu mai complet de la riquesa culturala e rituala dels ancessors europèus.