Es una vièlha costuma universitària: quand un cercaire reconegut partís a la retirada, sos amics, sos collègas e sos discípols li fan la suspresa de li ofrir un volum de contribucions scientificas, jos forma d’articles, cadun en foncion de son especialitat de recèrca. Lo volum ofèrt es apelat miscellanèas, del latin miscellaneus “mesclat”.

Divendres 29 de març, una partida de la comunitat universitària occitanista èra recampada a la Bibliotèca d’Estudis Meridionals, a Tolosa, per la remesa a Joan Ives Casanova de son volum de miscellanèas, adobat per Yan Lespoux, son ancian doctorand, ara mèstre de conferéncias a l’Universitat de Montpelhièr, e Francés Pic que ja aviá copublicat las miscellanèas en l’onor d’un autre grand cercaire, Felip Gardy en 2014. Lo volum entitolat Enfre lei mots e lei paraulas recampa 46 contribucions scientificas mas tanben de tèxtes literaris inedits ofèrts per d’amics (Sèrgi Javaloyès, Joan Ives Royer, Joan Luc Sauvaigo, etc.) e de reproduccions de tablèus (Inge Kresser, Joan Loís Fauthoux). En tot, 614 paginas que son a l’imatge dels centres d’interès desvolopats per Casanova pendent sa carrièra amb de trabalhs sus la literatura occitana de las epòcas medievala, modèrna e contemporanèa, sus la lenga, sus l’istòria, sus la literatura de lengas francesa, còrsa, catalana, tant en francés coma en occitan, en catalan, en còrs, en italian, totas las lengas que s’i interèssa Joan Ives Casanova.

Cal dire que Casanova es pas un universitari coma los que s’acontentan d’estudiar las òbras dels autres. Cèrtas, après aver ensenhat dins las universitats de Corti (Corsega), de Pau, ont èra professor despuèi 2002, e de Tolosa ont èra restacat al nivèl scientific (laboratòri PLH) e s’èstre interessat a d’autors tan divèrses coma Joan de Nostradama, Frederic Mistral, Mas-Felipe Delavouët, Max Roqueta, Apollinaire, Proust, lo professor retirat ven de publicar a las edicions Aqua Aura una soma de 1102 paginas consacrada al roman en lenga occitana entre 1840 e 1930. Mas i a un autre Casanova que s’amerita d’èstre conegut: dins la draia d’universitaris coma Robèrt Lafont e Felip Gardy, es tanben un poèta, un creator, autor de mai de 60 tèxtes marcats per una sensibilitat subtila, un sens de la lenga rar e un gost prigond per las poténcias del lengatge.

Divèrses autors. Enfre lei mots e lei paraulas. Mélanges offerts à Jean-Yves CASANOVA. Dòcuments, 2024. 500 paginas. 

De comandar a Éditions DÒCUMENTS
9, carrièra de Jean de Mansencal
F-31500 TOLOSA