Aperaquí 1400 personas assistiguèron ièr dijòus, 13 de junh, a las funeralhas d’Annia e Ben Vautier, que se tenguèron a 10h45 sul miralh d’aiga del Camin de Palhon a Niça. Los dos taüts arribèron cobèrts de la bandièra occitana estelada e acompanhats per l’imne occitan e d’autras melodias tradicionalas interpretadas pel grop niçard Nux Vomica.

Pendent la ceremònia, los del public poguèron daissar de messatges, de dessenhs e de flors a la pergòla abilitada per l’escasença. Dins lo tantòst, lors mainatges, Èva e Francés Vautier, saludèron lors parents dins l'intimitat un darrièr còp al crematòri.

EN IMAGES. Plus d'un millier de personnes rendent hommage à l'artiste Ben et à son épouse Anniehttps://t.co/xDPHRRJ0Gv#Nice06#Benpic.twitter.com/XdQBK0ycHn

— France 3 Côte d'Azur (@F3cotedazur) June 13, 2024

Benjamin Vautier, conegut coma Ben, defuntèt dimècres 5 de junh dins son ostal de Niça a 88 ans. Se suicidèt, l’endeman de la mòrt de sa molhèr Annie, amb la quala èra fòrça unit.

Reconegut internacionalament, Ben Vautier non èra pas solament un artista plastician, mas tanben un agitaire public, critic d’art, poèta, fotograf, pintre, decoraire e editor de libres. Nasquèt a Nàpols lo 18 de julhet de 1935. De maire occitanoirlandesa e paire francosoís, passèt son enfança dins divèrses païses coma Turquia, Egipte, Grècia e Itàlia, abans de s’establir a Niça en 1949. Foguèt un grand defensor de las lenga e cultura occitanas.

Èra plan conegut per sas frasas filosoficoartisticas, sovent escrichas sus de quasèrns, estuges e sacs d’esquina, que lo faguèron venir popular demest los mai joves. Foguèt un digne eiretièr dels dadaïstas e de Marcel Duchamp, e un representant important del movement Fluxus, conegut per sos happenings e accions de carrièra.

En 1959 se maridèt amb Jacqueline Robert, una afogada del nòu realisme e de Marcel Duchamp. A comptar d’alavetz, l’òbra de Ben se centrèt sus la poesia calligrafiada, l’apropriacion e la provocacion. Transformèt tanplan sa botiga de disques en una òbra d’art, en decorant la faciada amb un comol d’objèctes eteroclits. Desvolopèt sa teoria del “nòu art” e participèt a d’eveniments artistics importants coma la Misfits Fair de Londres e lo festenal d’expression liura de Jean-Jaques Lebel. En 1964 se maridèt amb Annie Baricalla amb qui aguèt dos enfants, Éva Cunégonde e François Malabar.

Ben èra tanben conegut per son afeccion particulara per colleccionar de bidets, en omenatge a Marcel Duchamp. Dins una entrevista a Paris Match en 2016, reconeguèt èsser un “panaire de bidets”, en los amassant per los emplir de flors dins son jardin.

Ben Vautier daissa un legat impressionant dins lo mond de l’art contemporanèu, amb una òbra marcada per l’irreveréncia, la provocacion e una prigonda reflexion filosofica. Sa mòrt representa una granda pèrda per la comunautat artistica niçarda, occitana e universala, per totes aqueles qu’an admiradas son òbra e sa personalitat unicas.