Aqueste mes, se tenon dins l’Aude uèch eveniments Total Festum, mas Vilamostausson (Carcassés) i a participat pel primièr còp, gràcias a un programa organizat per l’associacion Circul’Anim.

Foguèt lo dimars 11 de junh. S’entamenèt las festivitats a 18h15 amb una allocucion de Danielle Sarran de Circul’Anim, que presentèt lo programa de la serada e l’esperit del festenal. Véronique Fabre, primièra adjoncha al cònsol màger, exprimiguèt lo sosten de la comuna e se regaudiguèt de las novèlas animacions en onorant la cultura occitana.

Lo programa comencèt en musica. Coma l’escòla comunala podiá pas participar, son los mainatges de la calandreta Miquèl Decòr de Carcassona que prenguèron la scèna per interpretar de cançons e de poèmas jos la direccion de Pascale Moreno, amb Adrien Villeneuve als instruments tradicionals. Lo Còr Canti Canta encadenèt puèi amb un florilègi de cants tradicionals occitans. Mainatges e adultes partegèron la scèna per cantar amassa, e acabar amb un Se Canta entonat amb lo public.

La sala èra claufida de mond e fòrça gents esperlonguèron la vesprada en sopant sus plaça per contunhar las festivitats amb Jean Guilaine.

En 2024, lo Total Festum a luòc del 16 de mai al 9 de julhet. Es possible gràcias al sosten de la region dicha Occitània e de las associacions e comunas que prepausan mantun rendètz-vos festius, culturals e totjorn caloroses a l’entorn del solstici d’estiu, dels fuòcs de Sant Joan e de nòstras tradicions. Per aquesta edicion 2024, la 19a, s’es alestit mai de 120 eveniments amb la participacion de 220 intervenents e artistas.