“Aurem enfin l’escasença de parlar sus un pè d'egalitat amb l’esquèrra francesa”, çò a dich Peio Dufau, lo representant basquista d’EH-Bai que ven d’èsser elegit deputat a l’Assemblada Nacionala francesa, coma o raportàvem dijòus passat. Dins una entrevista publicada per Vilaweb, l’elegit abertzale (patriòta) a soslinhada l’importància de son trabalh e la responsabilitat que sent per las espèras plaçadas en el. Demest sas prioritats immediatas se tròba la defensa de la lenga basca e  las autras lengas minorizadas de l’estat francés, coma l’occitan.

Dufau s’engatja a èsser la votz del Bascoat a París, en representant non solament los abertzales d’esquèrra mas tota la societat de sa circonscripcion. Amb sos antecedents dins lo sindicalisme e l'aliança pel conselh municipal de Ziburu, Dufau vei son ròtle coma una escasença per superar las divisions politicas e trabalhar per una melhora societat.

Dufau a pas encara decidit a quin grop parlamentari s'inscriuriá, e mai soslinhe l'importància de manténer una cèrta libertat per agir independentament.

L’eleccion de Peio Dufau es un eveniment istoric essent que serà lo primièr sèti abertzale a l’Assemblada Nacionala francesa. Aqueste caminòt de 45 ans, adjonch fins ara al cònsol màger de Ziburu (Labord), es elegit jos la bandièra del Nòu Front Popular, mas son eleccion marca sustot un moment important del movement independentista basco dins l’estat francés.