La guèrra entre l'armada sodanesa e un poderós grop paramilitar a enfonzat lo país dins una grèva crisi umanitària. Per conéisser un pauc la situacion sus plaça, de jornalistas de The Washington Post an vesitat cinc vilas sodanesas jol contraròtle militar per documentar las experiéncias dels abitants. De soslinhar que dins fòrça cases las entrevistas se son tengudas en preséncia de foncionaris militars, çò qu’aurà limitat la libertat de parlar dels entrevistats. Vilaweb ne publica lo rapòrt complet en catalan.

Lo mètge

Ghassan Ahmed, un mètge de 26 ans, se trobava tot sol dins l'Espital Infantil Al-Buluk quand esclatèt la violéncia a Khartom. Protegiguèt los enfants e lors maires, e afrontèt de situacions perilhosas, coma de missils que subrevolavan l'espital. Amb lo sosten de l'Associacion de Mètges Americans de Sodan, l'espital a recuperat lo 80% de sa capacitat, malgrat las dificultats.

Lo presonièr

Luol Ajou, un mercenari sodanés del Sud, foguèt capturat après un intens bombardament. Recrutat pel Sodan del Sud e apuèj per las Fòrças de Sosten Rapid (RSF), recebèt pas jamai l’argent promés. Ara, sosca suls avertiments de son grand fraire de jónher pas la guèrra.

Lo paire

Hassan, un trabalhador del bastiment, a pas vist son filh Mokhlis dempuèi abans la guèrra. Perdèt sa femna e un autre filh a causa d'un obús e foguèt grèvament nafrat mentre que fugissiá. Ara, e mai siá estat desplaçat, contunha de cercar son filh en luchant per subreviure al mitan del conflicte.

L’activista

Mahmoud Abdirahman, un activista de 22 ans, collècta de fonzes per ajudar las familhas desplaçadas. Amb d’autres joves organiza de collectatges de ròba e establís de refectòris socials. Contunha de creire fermament a la democracia malgrat la guèrra.