Aquestes divendres 26 e dissabte 27 de julh, l’associacion La Gardarem prepausava la tenguda d’una Nòv’Estivada per explorar las draias de relança del rendètz-vos estivenc de l’Estivada, arrestada per volontat municipala de la majoritat de Rodés, per èsser remplaçada per una Festivada de vedetas francesas o anglofònas de show-biz (un budgt de 1,2 milion d’èuros amb un deficit de 600 000 èuros per l’edicion de 2023).

La comuna vesina de Sebasac acceptèt de reçaupre la Nòv’Estivada dins son complèxe culturaloesportiu. L’anfiteatre se revelèt  tròp pichon per reçaupre lo public del filme La lenga defenduda o los contes de l’Ives Durand. Lo gimnasi venguèt sala d’espectacle. Una granda sala se transformèt en Salon del Libre occitan…

Per capitar la tenguda de las doas jornadas, se poguèt comptar a l’encòp sus l’engatjament tanplan local coma d’associacions e estructuras del territòri occitan, nostalgicas de l’Estivada passada e convencudas de la necessitat del rendètz-vos.

Atal, roergasses, lengadocians, gascons, lemosins, auvernhats, provençals, catalans…. foguèron de la partida.

Se faguèt apèl a de productors locals per assegurar lo beure e lo manjar:  vins de Marcilhac, cervesas d’Aubrac, glacets de la bòria,… La calandreta de Rodés s’encarguèt de la fornidura del plat emblematic de la manifestacion: l’aligòt-salsissa!

La programacion artistica valguèt per sa qualitat, sa diversitat e son eclectisme: del balèti tradicional al punk-rock, dels vinils dels ans 1970 a CxK, dels contes de Segalar al recital multilingüe de Terra Sorore, etc.

E l’an que ven?

Una question traversava la tenguda de las jornadas: “Quin avenidor?”. Foguèt al centre d’un forum en 4 episòdis lo dissabte de matin e de vèspre. Los participants regetèron l’idèa d’un festenal que s’acontentariá de faire solament la programacion d’espectacles. Per gardar l’esperit Estivada, cal que las jornadas vengan una mena de laboratòri viu de la cultura occitana al present e avenidoira en prepausant de rescontres, de projèctes novators… a l’encòp bilanç e proposicions d’accions occitanas comunas, dobertura de draias e collaboracions...

S’abordèt la question de la lenga e foguèt clar que dins un festenal occitan la primautat es de balhar a l’expression occitana!

La manifestacion a de comptar sus las fòrças militantas, mas tanben sus de finançaments de trapar: ongan, la comuna de Sebasac e lo conselh regional de la region Occitània an ajudat, mas per ara lo conselh departamental d’Avairon a pas bolegat.

Se parlèt tanben d’un possible refortiment dels ligams entre festenals occitans: escambis, mutualizacions, sinergias, comunicacion... Atal, en 2025, quin ligam establir entre la Nòv’Estivada e l’Ostal Bodon que celebrarà los 50 ans de la mòrt del grand escrivan?

L’amassada generala de l’associacion La Gardarem, prevista per novembre, serà un moment- clau per considerar e bastir lo devenir d’una manifestacion que se n’espèra que recobrarà legalament lo nom: l’Estivada!

Per ne saber mai: estivada.eu