Lo Clacamion que conta l’istòria de Jordan, qui obreish un food truck vegetarian. A la carta, que i a garbura shens carn e plats a basa de flors. La soa mairana, Danielle, l’ajuda, mes que prefereish los plats a basa de guit e qu’ajusta la soa tòca personau a la carta. Cada episòdi que mòstra ua competicion sus l’escaduda deus lors plats, respectivament “vegetarian” o “veguit”, sus hons de discussions intergeneracionaus e de vita de vilatge.

Rodada a Cledas, un vilatge de cent abitants, la sèria que compren vint episòdis de tres minutas cadun. Segon Sud-Ouest, la còla que passè dètz dias a filmar, produsint dus a tres episòdis per dia. Dab un budget de 130 000 èuros finançat peu Centre Nacionau deu Cinèma e de l’imatge animat (CNC), lo departament de las Lanas e la region Nava Aquitània, la sèria que serà difusada dab sostítols en francés sus Òc Tèle e TV7.

Lo filmatge, entièrament en exterior, que s'ei adaptat aus bruts de la campanha. Las scènas qu’èran sovent interrompudas peu passatge de tractors o las esquiras de las vacas. Los actors, dont hèra que hèn las soas debutas au cinèma, que parlan naturaument occitan. Entaus qui’u mestrejan pas enqüèra, los sostítols que seràn indispensables. La productora Emmanuelle Glemet qu’a soslinhat l’importància d’apréner mots occitans pendent lo filmatge.

La sèria que trobè lo son lòc de filmatge per azard, quan la realizatora Eva Cassagnet estó encantada per la plaça principau de Cledas. Ua dusau sason que poiré estar considerada entà contunhar la competicion amistosa enter los plats “vegetarian” e “veguit”.

Àudio generat automaticament per votz.eu