Muhammad Al Baradai, vicepresident d’Egipte e prèmi Nobel de la Patz, a renonciat a sa carga. Al Baradai diguèt que s’opausava a las accions de violéncia de ièr al Caire. “Presenti la demission de la carga de vicepresident e demandi a Dieu que presèrve la nòstra Egipte aimada de tot çò marrit, e que complisca las esperanças e aspiracions del pòble”, çò ditz dins una letra al president interimari d’Egipte. “Los beneficiaris de çò que s’es passat son aqueles que claman per la violéncia e lo terrorisme e los grops extremistas. Coma sabètz, vegèri que i aviá de vias pacificas per n’acabar amb los afrontaments entre la societat e que foguèron prepausadas e acceptadas per que nos menèsson cap al consens nacional”, çò apondiá, per conclure en tot dire: “èra malaisit per ieu de contunhar en suportant tanta responsabilitat per de decisions que soi pas d’acòrdi amb elas e per las consequéncias que pòdon comportar. Pòdi pas suportar la responsabilitat de far versar de sang”.
 
Mentretant, contunhan los rambalhs entre los opausants al govèrn actual e la polícia e las fonts oficialas parlan ja de 149 mòrts, dont un operator de camèra del canal Sky News, qu’es estat fusilhat mentre que trabalhava.
 
Tot comencèt ièr de matin, quand un assaut policièr als acamps de protèsta dels islamistas al Caire causèt mai de cent mòrts. “Los mòrts son de policièrs e de civils”, çò diguèt lo pòrtavotz del ministèri. Divèrses testimònis explican que la polícia a tirat amb de balas per escampilhar los manifestants, e mai se la polícia o nega. De tot biais, lo govèrn a declarat l’estat d’emergéncia pendent tot un mes e la tension es a pojar.
 
Segon los Fraires Musulmans, los mòrts poirián arribar a qualques centenats, mai que mai de seguidors de l’èx-president Mursi, que manifestavan sus las plaças de Rabaa Al Adawiya e Nagda, al Caire, per exigir lo retorn de Mursi al govèrn del país.
 
Dempuèi lo còp d’estat dels militars, lo 3 de julhet, mai de 300 personas son estadas tuadas.
 
 
D’imatges espectacloses
 
Lo setmanièr The NewYorker a publicat una seguida de fotografias espectaclosas fachas ièr al Caire.
 
 
Seguiment de la premsa internacionala:
 
– Al Jazira: Egypt declares state of emergency
– The Guardian: Egyptian military government declares month long emergency
–  BBC: Egypt declares national emergency