Lo Sahara es reputat per èsser lo mai grand e lo mai caud desèrt del Mond. S’espandís de l’ocean Atlantic a l’oèst fins a la mar Roja a l’èst, e cobrís mai de 9,2 milions de quilomètres cairats. Aquel clima arid es degut a un sistèma de nauta pression permanent, la cresta subtropicala, qu’entraïna una davalada de l’aire que rend l’atmosfèra seca e establa e empacha aital la formacion de nívols e de precipitacions.

Pasmens, lo Sahara es pas totjorn estat un desèrt cremador. Fa solament qualques milièrs d’annadas, èra una region verdolenta amb de lacs, de rius e una vegetacion luxurianta. De cambiaments dins l’orbita terrèstra modifiquèron los regims climatics mondials, transformant aquela region verda en un dels luòcs mai secs de la planeta.

Los eveniments plujoses dins lo Sahara son fòrça rars, se produsent mens d’un còp per decenni en mejana. Aquel fenomèn es sovent associat a de cambiaments dins lo sistèma meteorologic de la Tèrra qu’indican una instabilitat de l’atmosfèra.

A l'ora d'ara, la zòna de convergéncia intertropicala (ZCIT), una benda de nívols de pluèjas eqüatorialas, s’es a desplaçar al nòrd de çò qu’es abitual, e portarà de pluèjas inesperadas dins lo grand desèrt african. Segon çò que rapòrta Andrej Flis dins lo portal Severe Weather Europe, las previsions actualas mòstran qu’aquela anomalia poiriá far de 2024 una de las annadas mai plujosas del darrièr decenni per aquela region desertica, que poiriá recebre mai del 500 % de las precipitacions normalas dins los jorns e setmanas venentas, e fins al 1000 % dins las regions centralas.

Aquel eveniment rar de pluèja poiriá senhalar una instabilitat mai vasta dins lo sistèma climatic mondial, amb d’impactes potencials sus las condicions meteorologicas dins d’autras regions del Mond, sustot en America del Nòrd e en Euròpa.

A rare #deluge could hit parts of the #Sahara that almost never get #rain this time of year
Some parts of the Sahara Desert will see 5 times their average August and September #rainfall. A few areas could experience rain for the first time on record in August or September. pic.twitter.com/u92FNreORS

— Hans Solo (@thandojo) September 1, 2024