Hakim Lokman, un curd de 45 ans, foguèt tabasat fins a la mòrt lo 31 d’agost passat a Istambol. Sa familha assegura que l’ataquèron perque parlava curd, sa lenga mairala, çò rapòrta Bianet. Lokman èra originari del Curdistan iraquian e se faguèt atacar dins un cafè del quartièr d’Aksaray, près de l’ostalariá ont se lotjava. Foguèt menat sul pic a l’espital mas moriguèt abans d’i arribar.

La familha de Lokman afirma que foguèt agarrit per un grop d’aperaquí dètz o dotze personas que reagiguèron violentament quand l’ausiguèron a parlar en lenga curda al telefòn. Un de sos cosins diguèt als mèdias qu’aquò “se passèt perque parlava curd. Lo grop l’insultèt, e Hakim, que sabiá tanben lo turc, lor respondèt. Es alavetz que lo tabasèron. La polícia emmenèt e placèt en gàrdia a vista doas personas qu’acompanhavan la victima. Cap dels atacaires es pas estat detengut.”

De son caire, lo govèrn turc a desmentit que lo murtre foguèsse motivat per asirança etnica, en assegurant que la disputa iniciala dins lo cafè sorgiguèt per “aver agachadas de femnas” e non pas per aver parlat curd. Segon las autoritats, l’assalhidor tabasèt Lokman après que l’agent de seguretat los aguèt expulsats de l’establiment.

Lo partit pròcurd DEM a condemnat lo crime, en lo qualificant d’ostil a la quita existéncia dels curds e en acusant lo govèrn turc de fomentar un clima d’òdi qu’alimenta d’actes tan violents.

En #HakimLokman va cometre el terrible crim de parlar en kurd per telèfon a Istambul. Va ser apallissat i assassinat per dotze ultres turcs.

Els kurds d’arreu del món l’homenatgen fent créixer aquest hashtag:#HakimLokman.

Els ajudem? pic.twitter.com/6z5umrUB55

— Francesc de Dalmases i Thió @JuntsXCat (@francescd) September 3, 2024