Catalonha festeja uèi sa Diada nacionala dins un ambient estranh amb un nòu govèrn regional de cant espanholista mas en pache amb un partit oficialament independentista. A mai, la fèsta se ten après una lei d’amnestia que, per ara, a amnistiats los policièrs del caire espanhòl mas que son interpretacion pels jutges manten encara en exili d’independentistas perseguits coma lo president Puigdemont.

La Diada 2024 en Catalonha es anonciada coma una mobilizacion descentralizada e unitària promoguda per sièis organizacions independentistas, dont l’Assemblada Nacionala Catalana (ANC), Òmnium Cultural e lo Conselh de la Republica. Jos la devisa “Tornem a las carrièras: independéncia”, se cèrca de mobilizar lo pòble dins mantuna vila catalana per denonciar las damatges sorgits de la dependéncia de l’estat espanhòl e reclamar l’independéncia coma solucion.

Ongan, las manifestacions auràn luòc a Barcelona, Girona, Lhèida, Tarragona e Tortosa, en metent en relèu de problèmas especifics de cada territòri, coma la crisi del lotjament, la degradacion del sistèma sanitari e la manca d’investiments en infrastructuras. Dins cada vila, una accion se tendrà a 16h, seguida de la lectura d'un manifèst unitari a 17h14 jos l'Arc de Trionf de Barcelona, difusat dins las autras vilas.

La crida cèrca un còp de mai de promòure una mobilizacion massissa per avançar devèrs la liberacion nacionala, malgrat la malescasuda de l’independéncia en octòbre de 2017, ont la reüssida del referendum independentista, pasmens enebit, desencadenèt la repression espanhòla. Dempuèi alara, l’independentisme, aflaquit per sas divisions politicianas e per sos resultats electorals, capita pas a recobrar lo vam unitari e popular d’abans lo referendum.

Una tièra de concèrts e d’activitats un pauc pertot clavaràn la jornada festiva.

L’11 de setembre, los catalans se remembran la casuda de Barcelona en 1714 davant las tropas de Felip V d’Espanha, felen de Loís XIV de França. Lo País Valencian èra tombat en 1707 e Malhòrca anava èsser vencuda en 1716. Aquela desfacha representèt la fin de las institucions catalanas e la castelhanizacion del país, imitant lo centralisme francés.