Del 28 al 31 d’octòbre de 2024, lo Domeni del Molinet, al Solièr (Espinosa) aculhirà un sojorn unic consagrat a las lenga e cultura occitanas. Organizat per Joanda e prepausat per L’Occitana Prod en partenariat amb lo conselh departamental d’Erau, aquel eveniment vos convida a descobrir o aprigondir la riquesa d’Occitània a travèrs d’activitats culturalas, educativas e amistosas.

L’eveniment prepausa un programa variat: de corses de lenga occitana adaptats a totes los nivèls, d’obradors de cant e de cosina locala, de balètis (bals tradicionals), d’espectacles e de passejadas de contes a l’entorn dels campairòls e de las castanhas. “La tòca es d’amassar los participants, novèls o experimentats, dins un moment de partatge e de descobèrta”, çò explica Joanda, l’organizaire.

Lo decòr natural del Domeni del Molinet, classat “Clau Verda” e situat dins lo Pargue Regional del Naut Lengadòc, contribuís a l’autenticitat de l’experiéncia. Aqueste luòc pacific, environat de bòsques, ofrís un lotjament de qualitat e una cosina facha a partir de produches de l'òrt, aprestada per un dietista. Joanda precisa que lo sojorn intègra de valors de desvolopament duradís, restacats a la preservacion de la cultura occitana per las generacions avenidoiras.

Lo prètz de 200 èuros compren totes los servicis: repaisses, lotjament e activitats. Un sojorn dobèrt a totes, que vengatz sol, en parelh o en grop, amb de plaças limitadas. Las inscripcions son dobèrtas al +33(0)6 05 15 04 79 per reservar una plaça e recebre lo programa detalhat.