Un individú intrèt ièr diluns a 10h15 dins lo sèti del jornal francés Libération, armat amb un fusilh; tirèt e feriguèt un fotograf independent, segon d’informacions del quite jornal. Après tirar, l’agressor fugiguèt.
 
Cal remembrar que divendres de matin, tanben a París, un òme armat intrèt dins lo sèti del canal de television BFM TV e menacèt los jornalistas abans de fugir. Dins aquela escasença i aguèt pas cap de victima. Segon los mèdias parisencs, que citan de fonts policièras, s’agiriá del meteis atacant.
 
La polícia empleguèt 45 veituras e dos elicoptèrs per ensajar d’arrestar l’atacant, mas  vèrs 16 oras ne perdèt las traças, après l’aver vist près de l’Ostal de la Ràdio, una bastissa de las ràdios publicas francesas. Qualques minutas puèi, lo procuraire de París, François Molins, publicava las fòtos presas per las camèras de seguretat e se demandèt la collaboracion dels ciutadans per trobar l’òme. Molins considèra que l’atac contra Libération es un acte terrorista.
 
“Sèm esglasiats davant aquesta tragèdia. Que qualqu’un intre amb una arma dins la sedença d’un jornal en una democracia es quicòm de plan seriós, independentament de l’estat mental de la persona qu’o fa. Se los jornals e los mèdias devon venir de bunquèrs, vòl dire que i a quicòm que truca dins la nòstra societat”, çò diguèt l’editor del jornal, Nicolas Demorand, a l’agéncia AFP.
 
Qualques oras pus tard la banca Société Générale raportèt sus son compte de Twitter qu’un òme armat dobriguèt lo fuòc sus la via publica davant una sedença de la banca del quartièr de La Défense. L’incident causèt pas de victimas e la polícia metèt tanben aquel afar en examen, çò apondèt la banca. Al delà, los mèdias locals raportavan que dins lo meteis quartièr, près d’ailà, un òme raubèt una veitura, prenguèt lo menaire coma ostatge e l’obliguèt de lo menar als Camps Elisis.
 
L’avís de recèrca visa un òme de tipe europèu, de 35 a 45 ans, abilhat de caqui.
 
 
 
_____
D’informacions en detalh sul sit de Libération. 
Seguida sus Twitter.