Actualitats
L’organizacion francesa de la Liura Pensada contra la Carta Europèa de las Lengas
L’organizacion ramenta la campanha reüssida d’oposicion que faguèt en 1999, e fa una crida a luchar per l’unitat e l’indivisibilitat de França
L’organizacion francesa nomenada la Liura Pensada (Féderation Nationale de la Libre Pensée) ven de manifestar son refús categoric que l’estat francés ratifique la Carta Europèa de las Lengas Regionalas o Minoritàrias. L’organizacion ramenta sa campanha reüssida d’oposicion ferma a las lengas mal nomenadas regionalas en 1999, e manifèsta que los arguments d’alavetz son encara valids. Menaça de far d’accions contra los dreches lingüistics e crida d’autras organizacions a agir per manténer la supremacia de la lenga francesa, per defendre los immigrants e “l’indivisibilitat” de França.
L’organizacion francesa de la Liura Pensada denóncia que la descentralizacion e la ratificacion de la Carta Europèa de las Lengas Regionalas o Minorizadas promouriá certanas unitats administrativas, en cambiant las regions actualas per d’entitats administrativas sus una basa lingüistica, çò que veson pas brica positiu. Dison qu’eles defendon las comunautats lingüisticas immigradas amb de lengas non territorialas coma los portugueses, los romaneses o los arabis. Al delà, denóncian que l’ensenhament de las lengas territorialas prendriá d’oras d’ensenhament a d’autras matèrias que considèran pus importantas.
Mas sustot dison qu’aquel tèxt europèu es pas acceptable perque “amb lo pretèxt de la promocion culturala de las lengas regionalas e minoritàrias, [la Carta] es una ataca prefonda contra l’unitat de totes los estats-nacions per anar vèrs una Euròpa de las regions, desreglamentada”. Çò que per d’unes seriá una umanizacion de las divisions administrativas, per eles es quicòm de marrit perque ven del lobby de “l’extrèma drecha europèa”. E dins lo sac d’aquela drecha i meton tanplan lo movement breton dels bonets roges e las revendicacions lingüisticas dels còrses. Totun, cal ramentar que lo Front Nacional, amb la majoritat dels movements ultradrechistas europèus, son tanben per la mantenença dels estats-nacions e per la supremacia de las lengas estatalas.
Fin finala, s’adreiçan a totas las organizacions que partagen lor vejaire, per defendre l’unitat e l’indivisibilitat de la Republica Francesa.
Aquela organizacion d’encastre estatal francés amassa de nomenats liurepensaires, e se definís coma organizacion non politica ni religiosa, que cèrca de desvolopar l’esperit de liure examen e de tolerància.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#15 bailan una adreiça mail. Lor ai escrich per los conviar a manifestar amb Riposte laïque, Debout la République, los joves populars e sabo pus quau, coma aquo, per de rire. Se me respondon (m'estonaria) o direi aici, per de rire tanben.
Per contra, sus la charta, la lejùa dau verbau de la comission de las leis mostra que la drecha critican lo texte Urvoas, que troban trop modèste (!). Aquo pot apreparar un vote negatiu lo jorn dau debat en plenària. Veirem ben.
Això és "liura pensada"? Això és feixisme. autoritarisme!
Ai visitat lo site de la Liura pensada : ai vist fòrça articles de tota mena mas ai pas vist la rubrica " expression liura " ont poiriam exprimir lo nòstre vejaire. Per contra podèm legir lo dògma nacionalo-republican de l'estat francés indivisible que vòl educar los endarreirats de las províncias que continuan de parlar lo patés. La vertat es qu'aquela organizacion pensa liurament e que nosautres devèm comprene que lo francés es una lenga neutra, la lenga de la libertat ( dels pòbles oprimits per Franca ) , antiracista e de la CUL TURA.
Gerard Bayle a fach lo bon diagnostic : la Liure pensaa es estaa pirataa per un gropuscle pseudo trotsquista, en gros los Hare Krisnha dau post gauchisme, que representan ren, e que chau doncas pas se far trop de lagui amb lors pausicions. Penso totun de lor escriure, d'abord que demandan de sostens, per lor conselhar de manifestar amb Riposte Laïque, Boulevard Voltaire, Debout la Républiue, los joves populars de l'UMP e lo Front Nacionau, brèu totes los que son tanben contra la Charta. Sio pas persuadat qu'aquesta sieie indispensabla, mas ren que per lo plaser de juar amb aqueu mond, lor escriurei, té.
Quina vergonya d'estat. Els francesos han aconseguit fer passar un imperi per una democràcia lliure. Aquest és el seu principal mèrit. El dia que els diferents països de l'Imperi francès decideixin ser lliures, podrà començar l'autèntica revolució (no pas francesa, sinó de cada país que decideixi inciciar-la, com Catalunya).
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari